Ndërtimet pa leje të konstatuara nga institucionet vendore apo organet e tjera administrative mund të përfshihen në një regjim të ri administrimi dhe konfiskimi, nëse qytetarët nuk i vetëdeklarojnë ato brenda afatit të përcaktuar.
Çështja u diskutua në Komisionin për Mjetet e Informimit Publik, ku Administratorja e Përgjithshme e Agjencisë për Administrimin e Pasurive të Sekuestruara dhe të Konfiskuara, Risena Xhaja, shpjegoi disa nga mekanizmat që parashikon nisma e re.
Sipas Xhajës, qytetarët do të kenë mundësi të përfitojnë edhe nga e drejta e parablerjes, nëse e raportojnë ndërtimin brenda 60 ditëve nga miratimi i ligjit të ri.
Në rast se ndërtimi pa leje është konstatuar nga institucionet dhe nuk vetëdeklarohet brenda afatit, ai mund të kalojë në procedurën e konfiskimit, sipas parashikimeve të reja.
Opozita kundërshton kompetencat e agjencisë
Përfshirja e ndërtimeve pa leje në kompetencën e Agjencisë për Administrimin e Pasurive të Sekuestruara dhe të Konfiskuara është kundërshtuar nga opozita gjatë diskutimeve në komision.
Debati është përqendruar edhe te mënyra se si do të administrohen pasuritë që nuk janë në përdorim nga agjencia.
Ankand për pasuritë e papërdorura
Një tjetër pikë e diskutuar është mundësia e zhvillimit të ankandeve, përmes të cilave individët apo subjektet private mund të blejnë pasuri që nuk përdoren nga agjencia.
Drejtuesja e agjencisë dhe përfaqësuesit e Ministrisë së Brendshme kanë argumentuar se qëllimi i ndryshimeve është që pasuritë e administruara nga shteti të shfrytëzohen në mënyrë sa më efikase dhe të mos humbasin vlerën me kalimin e kohës.
Diskutimet në komision pritet të vijojnë, ndërsa përmbajtja përfundimtare dhe procedurat konkrete do të përcaktohen nga miratimi i ndryshimeve ligjore.
Lexo edhe
400 biznese aplikojnë për “Dyfisho Sipërmarrjen Tënde”, Rama: 32 kredi miratuar janë miratuar
