Administrata e presidentit amerikan Donald Trump po përgatitet të financojë me 4 milionë dollarë media të djathta në Europë, si pjesë e një pakete më të gjerë fondesh amerikane për organizata të shoqërisë civile që promovojnë kauza konservatore në kontinent.
Sipas Reuters, i cili citon katër persona të njohur me planin, paketa e përgjithshme për programet e lidhura me Europën arrin në të paktën 25 milionë dollarë. Fondet menaxhohen nga Byroja për Demokracinë, të Drejtat e Njeriut dhe Punën në Departamentin amerikan të Shtetit.
Nga shuma e planifikuar, rreth 3 milionë dollarë pritet të shkojnë për një program që do të trajtojë çështje që lidhen me emigracionin, pavarësinë e medias dhe ndikimin e legjislacionit të institucioneve supranacionale. Një tjetër 1 milion dollarë parashikohet për krijimin e një rrjeti gazetarësh të pavarur që do të raportojnë mbi tema si sovraniteti kombëtar, të drejtat dhe liria fetare.
Departamenti i Shtetit argumenton se programet synojnë të forcojnë marrëdhëniet transatlantike dhe lirinë e shprehjes. Megjithatë, iniciativa mund të hapë një tjetër përplasje mes Uashingtonit dhe disa qeverive europiane, në një kohë kur administrata Trump ka shfaqur publikisht simpati për forcat populiste të djathta në Europë.
Franca ka reaguar më herët ndaj planeve të tilla. Ministri i Jashtëm francez Jean-Noël Barrot ka paralajmëruar se Parisi dhe vendet europiane nuk do të tolerojnë përpjekje për ndërhyrje të huaj në proceset e tyre zgjedhore, pavarësisht se nga vijnë ato.
Departamenti amerikan i Shtetit, nga ana tjetër, thekson se nuk financon parti politike dhe se programet lidhen me promovimin e demokracisë, të drejtave të njeriut dhe lirisë së shprehjes.
Lexo edhe:
Trump publikon hartën e Hormuzit, e paraqet si territor të ri të SHBA-së
Trump shpalli “operacionin shkatërrues”, reagon Irani: Terrorizëm ekonomik!
