Sekretari i Përgjithshëm i Partisë së Lirisë, Tedi Blushi, ka reaguar nga Priska e Madhe në Tiranë, ku vijon situata e rënduar nga zjarret.
Në një deklaratë nga terreni, Blushi e cilësoi situatën alarmante, duke thënë se flakët kanë shkrumbuar hektarë të tëra ullishte, pemë frutore dhe prona private e publike.
Ai kritikoi qeverinë dhe institucionet përgjegjëse për menaxhimin e situatës, ndërsa tha se edhe punonjësit zjarrfikës po përballen me flakët në kushte të vështira.
“Situatë alarmante, shteti të çohet në këmbë. Nuk janë braktisur vetëm qytetarët, por edhe zjarrfikësit”, deklaroi Blushi.
Sipas tij, zjarri është afruar rrezikshëm pranë banesave, ndërsa u bëri thirrje kryeministrit Edi Rama, ministrave dhe institucioneve përgjegjëse të ndërpresin pushimet dhe të dalin në terren.
Blushi akuzoi qeverinë se nuk ka investuar mjaftueshëm në modernizimin e shërbimit zjarrfikës, duke pretenduar se efektivët po punojnë me mjete dhe pajisje të vjetëruara.
Ai e lidhi situatën edhe me reformën territoriale të vitit 2014, duke e cilësuar Priskën e Madhe si një tjetër dëshmi të dështimit të saj.
“Priska e Madhe është një tjetër dëshmi e dështimit katastrofik të Reformës Territoriale të vitit 2014”, tha Blushi.
Sekretari i Përgjithshëm i Partisë së Lirisë ngriti gjithashtu shqetësimin për përhapjen e zjarreve në zona të tjera të vendit, duke përmendur Fushë-Arrëzin, Pukën, Memaliajn, Tepelenën dhe Libohovën.
Në deklaratën e tij, Blushi kritikoi edhe shpenzimet e qeverisë, duke përmendur koncertin e organizuar në Tiranë dhe duke pretenduar se fondet duhet të ishin orientuar drejt forcimit të kapaciteteve për përballimin e emergjencave.
Ai e mbylli deklaratën me një tjetër apel për institucionet që të reagojnë menjëherë, duke paralajmëruar se zjarri rrezikon banesat dhe pronat e familjeve në zonë.
Deklaratat e Tedi Blushit janë qëndrime politike të Partisë së Lirisë dhe akuzat e tij ndaj qeverisë nuk përbëjnë konstatime të pavarura faktike.
Lexo edhe:
PL kundër shkrirjes së bashkive, Blushi: Hartën e re të Shqipërisë ta vendosë sovrani me referendum
Blushi: Shkrirja e 15 bashkive cenon vetëqeverisjen vendore, harta e re të vendoset me referendum
