Kryeministri Edi Rama zhvilloi një vizitë zyrtare në Vatikan, ku u prit në një takim të veçantë nga Papa Leoni XIV, një moment i cilësuar prej tij si i ngrohtë dhe domethënës për marrëdhëniet mes Shqipërisë dhe Selisë së Shenjtë.
Në një postim në rrjetet sociale, Rama ndau pamje nga takimi me Atin e Shenjtë, ku ishte i shoqëruar edhe nga bashkëshortja Linda Rama dhe djali i tyre Zaho, duke shprehur publikisht mirënjohjen për pritjen:
“Mirëmëngjes dhe me disa çaste të bukura nga takimi me Papa Leonin XIV, ju uroj një ditë të mbarë”, shkroi Kryeministri në Facebook.
Takimi u zhvillua në Pallatin Apostolik, ndërsa bisedimet zyrtare vijuan në Sekretarinë e Shtetit të Vatikanit, ku në fokus ishin situata në Ballkan, stabiliteti rajonal dhe rruga e integrimit evropian të Shqipërisë.
Sipas Vatikan News, gjatë takimit me kardinalin Pietro Parolin, Sekretar i Shtetit të Selisë së Shenjtë, dhe imzot Paul Richard Gallagher, sekretar për Marrëdhëniet me Shtetet dhe Organizatat Ndërkombëtare, u vlerësua marrëdhënia e shkëlqyer mes Selisë së Shenjtë dhe Shqipërisë, si edhe bashkëpunimi mes bashkësisë kishtare dhe asaj civile.
Vizita e Kryeministrit në Vatikan u shoqërua edhe me momente reflektimi dhe falënderimi shpirtëror. Të mërkurën, Rama përcolli lutje për popullin shqiptar në bazilikën “Regina di Albania”, pranë shëmbëlltyrës së Zojës së Këshillit të Mirë, duke i besuar asaj fatin e vendit, familjet dhe rininë shqiptare.
Vizita vijoi në Bazilikën e Shën Pjetrit, përfshirë ambientet simbolike të Stanza delle Lacrime, ndërsa në përmbyllje Kryeministri Rama dhe bashkëshortja e tij nderuan kujtimin e Papa Françeskut, duke vizituar vendvarrimin e tij në bazilikën Santa Maria Maggiore.
Një vizitë e mbushur me mirënjohje, respekt dhe mesazhe uniteti, që riafirmon lidhjet historike dhe shpirtërore mes Shqipërisë dhe Selisë së Shenjtë.
