Kreu i Partisë Demokratike, Sali Berisha, ka dënuar atë që e cilësoi si “terror policor” ndaj studentëve dhe qytetarëve që morën pjesë në protestat e fundit. Në deklaratën e tij, Berisha paralajmëroi ndëshkime për efektivët që, sipas tij, kanë ushtruar dhunë ndaj protestuesve.
Berisha përdori tone të ashpra ndaj Policisë së Shtetit, duke i akuzuar punonjësit e saj për veprime të paligjshme dhe duke pretenduar se dhuna është ushtruar edhe ndaj gazetarëve.
“Garantoj secilin prej atyre narko-mercenarëve që për 2500 euro shndërrohen në kafshë dhe jo njerëz ndaj të rinjve, vajzave, djemve, qytetarëve, që do të dënohen për krime të rënda”, deklaroi Berisha.
Ai pretendoi gjithashtu se, krahas përplasjeve gjatë protestave, në disa qytete janë kryer kontrolle në banesa dhe janë ndaluar protestues për pjesëmarrjen në tubime.
Berisha: Do të mbani përgjegjësi për veprimet tuaja
Kreu i PD-së paralajmëroi përgjegjësi ligjore për efektivët që, sipas tij, kanë kryer kontrolle ose ndalime në kundërshtim me ligjin.
“Edhe njëherë, ti që shkon në kundërshtim me Kushtetutën dhe ligjin në banesën e tjetrit pa asnjë motiv ligjor, të garantoj se do bëhesh përgjegjës”, u shpreh ai.
Berisha akuzoi qeverinë e kryeministrit Edi Rama se po përdor Policinë e Shtetit për të mbrojtur pushtetin dhe përfundoi deklaratën me një paralajmërim ndaj efektivëve që, sipas tij, kanë shkelur ligjin.
Deklaratat e kreut të opozitës vijnë në një klimë tensionesh pas protestave të fundit, ndërsa pretendimet për dhunë policore dhe ligjshmërinë e veprimeve ndaj protestuesve kërkojnë vlerësim mbi bazën e fakteve dhe verifikimeve përkatëse.
Lexo edhe
“Betejën e ke të humbur, jep dorëheqjen”, Berisha: Studentët triumfuan, nuk i mposht dhuna
“Arritje historike”, Berisha uron shqiptarët e Luginës së Preshevës për dy mandatet
