Drejtoria Vendore e Policisë Tiranë ka reaguar pas publikimit në rrjetet sociale të një videoje ku shfaqen disa persona të neutralizuar nga efektivët e policisë.
Në një njoftim për mediat, policia sqaron se personat e shfaqur në video nuk ndodheshin në dhomat e shoqërimit të komisariateve apo në ambientet e bllokut të sigurisë, por në momentin e parë të neutralizimit të tyre në flagrancë.
Sipas policisë, ngjarja ka ndodhur në një institucion shtetëror, ku personat në fjalë dyshohet se po tentonin të hynin dhe po sulmonin punonjësit e policisë.
“Personat e shfaqur në videon e publikuar në media nuk janë në dhomat e shoqërimit në komisariate apo në dhomat e bllokut të sigurisë, por janë në momentin e parë të neutralizimit në flagrancë nga shërbimet e Policisë”, thuhet në reagim.
Policia bën me dije se pas neutralizimit, personat janë shoqëruar në komisariat nga shërbimet policore.
Reagimi vjen pas diskutimeve të krijuara në rrjetet sociale lidhur me pamjet e publikuara dhe mënyrën e trajtimit të personave të ndaluar gjatë protestave në Tiranë.
Lexo edhe
‘Pamje horror’/ Berisha denoncon trajtimin çnjerëzor e studentëve të arrestuar: Krim monstruoz!
Bardhi denoncon trajtimin e të rinjve në komisariate: “Pamje të rënda, ky është trajtim çnjerëzor!”
