Ministri i Financave, Petrit Malaj, Drejtori i Përgjithshëm i Drejtoria e Përgjithshme e Doganave, Besmir Beja, dhe ambasadori i Mbretëria e Bashkuar në Shqipëri, Nicholas Abbott, zhvilluan një vizitë në Degën Doganore të Bllatës, ku inspektuan investimin e realizuar nga qeveria britanike për modernizimin e sistemeve të monitorimit dhe kontrollit kufitar.
Gjatë vizitës, ministri Malaj vlerësoi mbështetjen e Mbretërisë së Bashkuar në forcimin e sigurisë kufitare dhe modernizimin e administratës doganore shqiptare.
“Ky është një investim që shtrihet në 11 pika doganore dhe kap vlerën e 1.6 milionë paundëve, i financuar nga Home Office i Mbretërisë së Bashkuar”, deklaroi Malaj.
Nga ana e tij, Besmir Beja bëri të ditur se projekti ka rritur ndjeshëm kapacitetet operacionale të doganave shqiptare.
Sipas tij, administrata doganore tashmë disponon 121 kamera moderne monitorimi, të cilat mundësojnë kontroll më efikas të lëvizjeve në pikat kufitare, duke garantuar njëkohësisht siguri dhe shërbim më të shpejtë për qytetarët dhe bizneset.
“Çdo qytetar dhe çdo biznes që kalon në territorin e Republikës së Shqipërisë do të ketë kontrollin e duhur, por edhe shpejtësinë e nevojshme në këtë proces”, u shpreh Beja.
Ambasadori Nicholas Abbott e cilësoi projektin si një shembull konkret të bashkëpunimit të suksesshëm mes dy vendeve në fushën e sigurisë kufitare dhe luftës kundër aktiviteteve të paligjshme.
“Ajo që kemi bërë në bashkëpunim me doganat shqiptare është një shembull i marrëdhënieve të ngushta mes dy vendeve tona. Kemi rezultate pozitive dhe jam i kënaqur që kemi punuar së bashku për të arritur në këtë fazë”, deklaroi Abbott.
Sipas autoriteteve, bashkëpunimi ndërmjet administratës doganore shqiptare dhe institucioneve britanike, përfshirë Home Office International Operations dhe HM Revenue & Customs (HMRC), ka ndihmuar në modernizimin e sistemeve të kontrollit kufitar dhe forcimin e kapaciteteve për menaxhimin e riskut.
Në kuadër të projektit janë instaluar sisteme moderne kamerash monitorimi dhe teknologji për leximin automatik të targave, të cilat synojnë të ndihmojnë në parandalimin e trafiqeve të paligjshme, identifikimin e lëvizjeve me risk të lartë dhe goditjen e rasteve të transportit të parave të padeklaruara në kufi.
