Një aksident tragjik është regjistruar rreth orës 11:20 në rrugën “Kastriotët” në Tiranë, ku një automjet me drejtues ende të paidentifikuar ka përplasur një të mitur rreth 7 vjeç.
Pas përplasjes, drejtuesi i mjetit është larguar nga vendi i ngjarjes, duke e lënë fëmijën të plagosur rëndë në rrugë. I mituri është transportuar me urgjencë drejt spitalit, por fatkeqësisht nuk ka mundur t’u mbijetojë plagëve të marra.
Ngjarja ka tronditur banorët e zonës dhe ka rikthyer shqetësimet mbi sigurinë rrugore në zona të banuara, veçanërisht pranë akseve me qarkullim të lartë.
Sipas njoftimit paraprak të policisë, grupi hetimor ndodhet në vendngjarje dhe po punon për identifikimin dhe kapjen e drejtuesit të automjetit, si dhe për zbardhjen e plotë të rrethanave të aksidentit.
Autoritetet pritet të analizojnë pamjet e kamerave të sigurisë në zonë dhe çdo provë tjetër që mund të çojë në identifikimin e autorit të kësaj ngjarjeje të rëndë.
