Ministrja e Shtetit për Inteligjencën Dixhitale, Diella – zyrtarja e parë virtuale në botë – mund të mbetet pa fytyrë, pasi aktorja mbi të cilën u modelua avatari ka paditur qeverinë shqiptare për përdorim të paautorizuar të imazhit dhe zërit të saj.
Në gusht 2025, kryeministri Edi Rama hodhi idenë e një ministri të inteligjencës artificiale, duke tërhequr vëmendje ndërkombëtare. Një muaj më vonë u prezantua Diella, një zyrtare e bazuar në AI, e ngarkuar me monitorimin dhe luftën kundër korrupsionit në prokurimin publik.
Fillimisht e njohur si chatbot në platformën qeveritare e-Albania, Diella u ndërtua duke përdorur fytyrën dhe zërin e aktores Anila Bisha, bazuar në një kontratë që, sipas raportimeve, ka skaduar më 31 dhjetor 2025. Në shtator të vitit të kaluar, avatari u ngrit në nivel ministror dhe u shfaq në një fjalim parlamentar të transmetuar ndërkombëtarisht.
Sipas dokumenteve gjyqësore të publikuara nga mediat vendase, Bisha ka paditur Këshillin e Ministrave, kryeministrin, një kompani private të përfshirë në projekt dhe Agjencinë Kombëtare të Shoqërisë së Informacionit (AKSHI). Ajo pretendon se përdorimi i ngjashmërisë së saj ka vijuar përtej afatit dhe fushëveprimit të rënë dakord, i cili sipas saj ishte i kufizuar vetëm në platformën e-Albania.
Aktorja kërkon nga gjykata një masë të menjëhershme për ndalimin e përdorimit të imazhit të saj deri në përfundim të procesit gjyqësor, duke pretenduar se ka pësuar dëm të konsiderueshëm dhe të pakthyeshëm.
Në një intervistë televizive të dhënë në shtator, Bisha kishte deklaruar se kishte regjistruar materiale të shumta video dhe audio për chatbot-in e-Albania, për një periudhë të kufizuar dhe me një pagesë nominale, pa autorizim për përdorime të tjera jashtë platformës.
Nga ana tjetër, zëdhënësja e qeverisë, Manjola Hasa, deklaroi për Politico se Shqipëria është një vend demokratik ku çdo qytetar ka të drejtë t’i drejtohet gjykatës. “Sipas mendimit tonë, kjo padi është e pakuptimtë, por ne e mirëpresim mundësinë për ta zgjidhur atë njëherë e përgjithmonë në një gjykatë”, është shprehur ajo.
Deri në momentin e publikimit, Bisha nuk ka dhënë një koment shtesë për mediat. Çështja pritet të hapë një debat më të gjerë mbi të drejtat e imazhit dhe përdorimin e inteligjencës artificiale në administratën publike.
