Rripi i Gazës është tronditur ditën e sotme nga një seri sulmesh ajrore izraelite, të cilat sipas autoriteteve lokale kanë shkaktuar të paktën 31 viktima, mes tyre gra dhe fëmijë. Një nga goditjet më të rënda është regjistruar në qytetin jugor të Khan Younis, ku është goditur një tendë që strehonte persona të zhvendosur nga luftimet.
Ushtria izraelite ka deklaruar se sulmet janë kryer pas asaj që e cilësoi si shkelje të armëpushimit nga Hamasi. Nga ana tjetër, grupi palestinez i ka përshkruar këto bombardime si më të rëndat që prej armëpushimit të ndërmjetësuar nga Shtetet e Bashkuara në muajin tetor, duke akuzuar Izraelin për përshkallëzim të qëllimshëm të konfliktit.
Sipas njoftimit të forcave izraelite, objektivat e goditura përfshijnë tunele nëntokësore, depo armësh dhe figura drejtuese të Hamasit. Ndërkohë, Hamasi ka dënuar ashpër sulmet, duke i cilësuar si “luftë brutale kundër Rripit të Gazës” dhe i ka bërë thirrje SHBA-së për ndërhyrje të menjëhershme për të ndalur dhunën.
Tensionet mes palëve vijojnë të rriten, ndërsa armëpushimi duket gjithnjë e më i brishtë dhe situata humanitare në Gaza mbetet kritike.
