Zv.presidentja e Partisë së Lirisë, Erisa Xhixho, ka reaguar për situatën në arsimin shqiptar pas përfundimit të vitit shkollor, duke ngritur shqetësime për cilësinë e mësimdhënies, largimin e nxënësve dhe mungesën e lidhjes mes arsimit dhe tregut të punës.
Në deklaratën e saj, Xhixho pyet se “ku po shkon arsimi shqiptar”, duke argumentuar se sistemi arsimor po përballet me një krizë të thellë që lidhet me cilësinë, financimin dhe shpopullimin.
“60% e të rinjve janë analfabetë funksionalë”
Sipas Xhixhos, rreth 60% e të rinjve shqiptarë klasifikohen si analfabetë funksionalë, një shifër që sipas saj është disa herë më e lartë se mesatarja e Bashkimit Europian.
Ajo deklaron se kjo nënkupton që shumë të rinj përfundojnë shkollimin pa aftësitë bazë për të kuptuar, analizuar informacionin dhe për t’u përballur me kërkesat e tregut modern të punës.
Deputetja e Partisë së Lirisë ka ngritur gjithashtu shqetësimin për paradoksin e tregut të punës, ku Shqipëria importon punëtorë të huaj, ndërsa shumë të rinj shqiptarë mbeten të papunë.
Të rinjtë me arsim të lartë përballen me papunësinë
Duke iu referuar të dhënave të INSTAT, Xhixho tha se rreth 17.800 persona me arsim të lartë janë të papunë, ndërsa të rinjtë përbëjnë rreth 55% të kësaj kategorie.
Sipas saj, këto shifra tregojnë se sistemi arsimor nuk po arrin të përshtatet me nevojat e ekonomisë dhe tregut të punës.
Rënia e numrit të nxënësve dhe mbyllja e shkollave
Një tjetër problem i ngritur nga Xhixho lidhet me ndikimin e emigracionit dhe shpopullimit në sistemin arsimor.
Sipas saj, gjatë dhjetë viteve të fundit Shqipëria ka humbur rreth 113 mijë nxënës, ose afërsisht një të tretën e popullsisë shkollore.
Ajo thekson se situata është edhe më e rëndë në arsimin e mesëm, ku numri i nxënësve është përgjysmuar brenda një dekade.
Po ashtu, Xhixho deklaron se mbi 300 shkolla nuk funksionojnë më si më parë, ndërsa shumë prej tyre janë mbyllur ose funksionojnë vetëm me klasa të bashkuara.
Kritika për financimin e arsimit
Zv.presidentja e Partisë së Lirisë kritikoi nivelin e financimit të arsimit, duke deklaruar se Shqipëria shpenzon vetëm 2.5% të Prodhimit të Brendshëm Bruto për arsimin, duke e renditur ndër vendet me financimin më të ulët në rajon.
Sipas saj, nuk mund të kërkohen rezultate europiane me investime larg standardeve të vendeve të Bashkimit Europian.
Ajo krahasoi financimin e arsimit me fondet e përdorura për koncesione dhe projekte të tjera, duke pretenduar se qeveria nuk ka vendosur arsimin si prioritet.
Kritika për shkollën “Edith Durham”
Në deklaratën e saj, Xhixho përmendi edhe rikonstruksionin e shkollës 9-vjeçare “Edith Durham” në Tiranë, duke ngritur pikëpyetje për planifikimin e investimeve publike.
Sipas saj, shkolla e re ka më pak klasa se godina e mëparshme, ndërsa Tirana vijon të ketë mungesë të ambienteve të reja arsimore.
“Pa arsim cilësor nuk ka zhvillim”
Në përfundim të deklaratës, Erisa Xhixho tha se arsimi duhet të trajtohet si investimi më i rëndësishëm për të ardhmen e vendit.
Sipas saj, një sistem arsimor i dobët sjell pasoja në zhvillim ekonomik, emigracion dhe varfëri.
“Një vend që nuk investon te arsimi nuk ndërton të ardhmen”, deklaroi Xhixho, duke kërkuar më shumë financim, laboratorë modernë, biblioteka dhe kushte më të mira për nxënësit dhe mësuesit.
Lexo edhe
Erisa Xhixho: Reforma territoriale duhet të vendoset me referendum
Xhixho: Qeveria po përgatit një tjetër monopol në shëndetësi
