Kryetari i Partisë Demokratike, Sali Berisha, zhvilloi një takim me studentë të shkollës prestigjioze Sciences Po, ku në fokus të diskutimit ishin korrupsioni, ekonomia dhe rruga e Shqipërisë drejt Bashkimit Europian.
Gjatë bashkëbisedimit, Berisha theksoi nevojën për reforma të thella në luftën kundër korrupsionit, duke propozuar uljen e procedurave burokratike, taksa më të favorshme dhe përdorimin e teknologjisë për të rritur transparencën në tenderat publikë.
Sipas tij, praktikat aktuale të prokurimeve shpesh pengojnë pjesëmarrjen e kompanive nga Bashkimi Evropian dhe nuk janë në përputhje me standardet e tregut europian.
Në diskutim u trajtuan edhe zhvillimet rajonale, ku Berisha kundërshtoi idenë e një integrimi të diferencuar, duke iu referuar qëndrimeve të Edi Rama dhe Aleksandar Vučić. Ai theksoi se e ardhmja e Shqipërisë dhe rajonit mbetet anëtarësimi i plotë në BE.
Berisha ngriti gjithashtu çështje që kërkojnë më shumë transparencë dhe hetim, duke përmendur raste me interes publik dhe nevojën për standarde më të larta në funksionimin e institucioneve.
Në pjesën e diskutimit mbi historinë, ai u ndal te figura e Havzi Nela, duke kërkuar më shumë vlerësim për të në nivel europian.
Takimi u zhvillua në formën e një bisede të hapur me studentë nga vende të ndryshme europiane, ku u diskutuan edhe sfidat e rajonit dhe procesi i integrimit të Shqipërisë në strukturat europiane.
