Kreu i Grupit Parlamentar të Partisë Demokratike, Gazment Bardhi, ka reaguar ashpër pas prezantimit nga kryeministri Edi Rama të paketës së re ligjore kundër dhunës, duke e cilësuar atë si një përpjekje për të kufizuar protestat dhe liritë qytetare.
Në reagimin e tij, Bardhi akuzon kryeministrin se po kërcënon studentët dhe të rinjtë që protestojnë, ndërsa pretendon se masat e propozuara janë antikushtetuese.
“Sapo shpalli diktaturën! Të paktën në mendjen e tij të sëmurë”, shkruan Bardhi, duke shtuar se shqiptarët nuk do të pranojnë, sipas tij, të kthehen 36 vite pas për të mbrojtur pushtetin e kryeministrit.
Deputeti demokrat e akuzon Ramën se ka marrë përsipër përgjegjësinë për dhunën policore ndaj studentëve dhe të rinjve, ndërsa pretendon se paralajmërimet për masa ndaj protestuesve synojnë të frikësojnë qytetarët.
“Do t’ia mbyllë gojën kujtdo. Do ta burgosë këdo. Do ta gjobisë këdo”, shprehet Bardhi në reagimin e tij.
Ai e cilëson paketën e prezantuar nga kryeministri si një “paketë kundër studentëve” dhe deklaron se asnjë prej masave nuk do të realizohet. Bardhi pretendon gjithashtu se propozimet bien ndesh me Kushtetutën, pa paraqitur në reagimin e publikuar argumente të detajuara ligjore për këtë pretendim.
Në fund të reagimit, kreu i Grupit Parlamentar të PD-së e cilëson Ramën si një kryeministër politikisht të mbaruar dhe shprehet se asnjë kërcënim nuk do të ndalë, sipas tij, vullnetin e qytetarëve për liri, drejtësi dhe demokraci.
Reagimi i Bardhit vjen pas prezantimit të paketës me gjashtë instrumente ligjore nga kryeministri Rama, e cila përfshin dëmshpërblimin e bizneseve të dëmtuara, masa për riparimin e dëmeve gjatë tubimeve dhe ndryshime të propozuara në legjislacionin përkatës.
lexo edhe
Bardhi denoncon trajtimin e të rinjve në komisariate: “Pamje të rënda, ky është trajtim çnjerëzor!”
