Deputetja e Partisë së Lirisë, Erisa Xhixho, ka akuzuar qeverinë se po dëmton sistemin shëndetësor dhe po përgatit, sipas saj, një tjetër skemë monopoliste në sektorin e furnizimit me ilaçe dhe pajisje mjekësore.
Në një reagim publik, Xhixho iu referua raportit të fundit të Dhomës Amerikane të Tregtisë, duke deklaruar se dokumenti evidenton nivelin e ulët të investimeve në shëndetësi dhe pasojat që kjo sjell për qytetarët.
Sipas saj, Shqipëria shpenzon rreth 330 euro për banor për kujdesin shëndetësor, ndërsa financimi publik për shëndetësinë përbën 2.9% të Prodhimit të Brendshëm Bruto, shifra që, sipas deklaratës, mbetet ndër më të ulëtat në rajon.
Deputetja e Partisë së Lirisë shtoi gjithashtu se, duke iu referuar të dhënave të Organizatës Botërore të Shëndetësisë, rreth 60% e shpenzimeve për kujdesin shëndetësor mbulohen drejtpërdrejt nga qytetarët, duke rënduar buxhetin e familjeve shqiptare.
Xhixho kritikoi edhe projektligjin e ri për furnizimin me ilaçe dhe pajisje mjekësore, duke pretenduar se ai krijon kushtet për ngritjen e një kompanie publiko-private me rol dominues në prokurimet e sektorit.
Sipas saj, një model i tillë do të kufizonte konkurrencën dhe do të përqendronte prokurimet në një subjekt të vetëm.
Në deklaratën e saj, deputetja e cilësoi këtë nismë si vijimësi të koncesioneve të mëparshme në shëndetësi dhe akuzoi qeverinë se po favorizon interesa të ngushta në kurriz të pacientëve.
Në përfundim, Xhixho deklaroi se, sipas saj, shëndetësia nuk duhet të përdoret për interesa politike apo ekonomike dhe kërkoi më shumë investime, transparencë dhe mbështetje për sistemin publik shëndetësor.
Lexo edhe:
Erisa Xhixho: Kuvendi është kthyer në noter të qeverisë, ligjet kalojnë pa debat dhe transparencë
Erisa Xhixho: Reforma territoriale duhet të vendoset me referendum
