Pas paraqitjes së tij në SPAK, në kuadër të masës së sigurisë “detyrim paraqitje”, Berisha u pyet nga gazetarët nëse opozita do të vijojë me axhendën e protestave kundër qeverisë.
Lideri demokrat tha se aktualisht Partia Demokratike është e angazhuar me organizimin e zgjedhjes së kryetarit të partisë, ku ai është kandidati i vetëm, si dhe me përgatitjet për Kuvendin Kombëtar.
“Pas 30 majit rikthehemi fuqishëm”
Berisha paralajmëroi se protestat do të rinisin në ditët e para të qershorit, të cilat ai i cilësoi si “kryengritja paqësore më e fuqishme që ka njohur Shqipëria”.
“Në mënyrën më të fuqishme do vazhdohet me protesta. Por siç e dini, nga sot deri më datën 30 janë dy ngjarje të mëdha. Është referendumi për votëbesimin e kryetarit dhe është Kuvendi Kombëtar. Këto janë procese që kërkojnë punë të gjerë. Ndaj të siguroj që ditët më të para të qershorit do të jetë kryengritja paqësore më e fuqishme që ka njohur Shqipëria”, deklaroi Berisha.
Deklarata e kreut të opozitës vjen në një kohë tensioni politik mes opozitës dhe mazhorancës, ndërsa Partia Demokratike ka paralajmëruar prej javësh aksione proteste lidhur me zhvillimet politike dhe proceset zgjedhore në vend.
