“El Mencho”, lideri i kartelit Jalisco New Generation, u përcoll për në banesën e fundit me një ceremoni funerale nën masa të forta sigurie në Meksikë. Ai u varros në një arkivol të artë në varrezat “Recinto de la Paz” në Zapopan, pranë Guadalajara, qyteti i dytë më i madh në vend.
Trupi i tij u transportua nga një shtëpi funerale në Guadalajara drejt varrezave, ndërsa gjatë ceremonisë u vu re prezenca e madhe e ushtrisë dhe forcave të sigurisë. Vetëm dhjetëra persona morën pjesë, shumica me çadra të zeza, ndërsa një bandë muzikore interpretonte këngë tradicionale meksikane.
Autoritetet nuk kanë konfirmuar zyrtarisht vendndodhjen e varrit për arsye sigurie, ndërsa zona rreth shtëpisë funerale ishte nën mbikëqyrje të rreptë që prej një dite më parë, duke garantuar mbrojtje maksimale për ngjarjen dhe pjesëmarrësit.
