Një zhvillim i papritur ka shoqëruar protestën e 28-të qytetare, ku është transmetuar një video e ministres Diella, në të cilën ajo njofton dorëheqjen nga detyra.
Në deklaratën e saj, ministrja lidh largimin me zhvillimet e fundit dhe debatin publik të krijuar pas çështjes së Zvërnecit, e cila prej javësh ka shkaktuar reagime të shumta dhe protesta në vend.
Videoja është shfaqur gjatë protestës së mbrëmjes, duke shkaktuar reagime dhe duartrokitje nga pjesëmarrësit. Në fjalën e saj, ministrja pranon përgjegjësinë politike dhe deklaron se vendimi i saj synon t’i hapë rrugë një reflektimi më të gjerë institucional.
Dorëheqja e saj vjen në një moment kur protestat qytetare kanë hyrë në javën e katërt dhe kërkesat e protestuesve janë zgjeruar përtej çështjeve mjedisore, duke përfshirë edhe kërkesa politike dhe institucionale.
Pas publikimit të videos, protestuesit kanë drejtuar thirrje ndaj kryeministrit Edi Rama, duke kërkuar që edhe ai të marrë përgjegjësi politike për situatën.
Deri tani nuk ka pasur një reagim zyrtar nga Kryeministria lidhur me deklaratën e ministres apo zhvillimet e fundit të protestës.
Nëse dorëheqja konfirmohet zyrtarisht, ajo do të përbënte largimin e parë të një anëtari të kabinetit qeveritar që nga nisja e protestave qytetare.
