Një autobus është përfshirë në një aksident në hyrje të qytetit të Elbasanit, duke shkaktuar dëme materiale dhe momente paniku për shkak të afërsisë me një pikë furnizimi me karburant.
Sipas informacioneve paraprake, drejtuesi i autobusit ka humbur kontrollin mbi mjetin, i cili është përplasur me tabelën e një karburanti. Si pasojë e goditjes, tabela është dëmtuar, ndërsa autobusi ka përfunduar pranë ambienteve të pikës së karburantit.
Fatmirësisht, deri në këto momente nuk raportohen persona të lënduar apo pasoja të tjera serioze nga aksidenti.
Ngjarja ka shkaktuar shqetësim te kalimtarët dhe drejtuesit e mjeteve, pasi situata mund të kishte marrë përmasa më të rënda duke pasur parasysh afërsinë e autobusit me zonën e furnizimit me karburant.
Autoritetet kanë nisur verifikimet për të zbardhur shkaqet e aksidentit, ndërsa pritet një informacion më i detajuar nga policia.
