Në fjalën e tij, Kurti deklaroi se kjo është fitorja e pestë e LVV-së në zgjedhjet parlamentare brenda shtatë viteve të fundit, duke përmendur sukseset elektorale të viteve 2019, 2021, dy proceset zgjedhore të vitit 2025 dhe zgjedhjet e vitit 2026.
Sipas tij, rezultati përbën një konfirmim të mbështetjes qytetare për qeverisjen e Vetëvendosjes dhe një dëshmi të besimit të qytetarëve ndaj politikave të saj.
“Ne bëjmë bashkë sigurinë e shtetit dhe kufijve me mirëqenien e qytetarëve. Nuk ka vështirësi që nuk e kemi tejkaluar, sepse tash ka shtet për krejt, e ne jemi krejt për shtet”, u shpreh Kurti para mbështetësve, duke përsëritur sloganin e partisë.
Ai theksoi se qytetarët te Vetëvendosja gjejnë garanci për mirëqeverisje dhe shtoi se partia që drejton është e gatshme të vazhdojë punën në interes të vendit, duke e krahasuar këtë qasje me atë që e quajti “blloku opozitar”.
Në fund të fjalës së tij, Kurti kërkoi që legjislatura e 11-të të nisë sa më shpejt punën dhe paralajmëroi takime e konsultime me të gjitha partitë politike në ditët në vijim, me synim formimin e institucioneve të reja dhe vazhdimin e qeverisjes.
