Kreu i Partisë Demokratike Sali Berisha ka deklaruar se Kuvendi Kombëtar i partisë ka shënuar, sipas tij, një proces të rëndësishëm ripërtëritjeje në strukturat drejtuese.
Në një prononcim për mediat, Berisha tha se pas përfundimit të numërimit të votave të delegatëve të Kuvendit Kombëtar të datës 30 maj, është formuar Këshilli Kombëtar i ri i Partisë Demokratike, të cilin e cilësoi si organin e dytë më të rëndësishëm të partisë.
Ai përgëzoi të gjithë të zgjedhurit dhe falënderoi delegatët për procesin e votimit, duke theksuar se çdo kandidat mbetet, sipas tij, një figurë e rëndësishme e PD pavarësisht rezultatit.
Berisha theksoi se procesi i numërimit të votave është zhvilluar në mënyrë transparente dhe në prani të mediave, ndërsa ftoi çdo kandidat që ka dyshime të verifikojë votat e tij përmes komisionit përkatës.
Sipas tij, një nga zhvillimet kryesore të këtij Kuvendi është përfshirja e gjerë e të rinjve në strukturat drejtuese, ku rreth 30% e anëtarëve të Këshillit Kombëtar janë nën moshën 30 vjeç.
Një tjetër risi, sipas Berishës, është përfaqësimi i grave dhe vajzave, të cilat përbëjnë rreth 40% të Këshillit Kombëtar, një nivel që ai e cilësoi si historik për Partinë Demokratike.
Ai shtoi se, pavarësisht rezultateve individuale të disa kandidaturave, të gjitha figurat që nuk u zgjodhën mbeten pjesë e rëndësishme e strukturës dhe aktivitetit politik të PD.
