Policia e Tiranës ka finalizuar operacionin e koduar “Night Clubs”, pas disa muajsh hetimesh me metoda proaktive, duke goditur një rrjet të gjerë shpërndarjeje droge brenda lokaleve të natës në zonën e Ish-Bllokut.
Nga hetimet rezultoi se 11 shtetas, punonjës dhe administratorë të lokaleve, dyshohen për shpërndarje të lëndëve narkotike. Gjykata ka caktuar 11 masa sigurie, prej të cilave 9 janë ekzekutuar me arrest në burg, ndërsa 2 persona janë ende në kërkim.
Operacioni çoi edhe në arrestimin në flagrancë të një 49-vjeçari, i cili kishte thyer masën e sigurisë “Arrest në shtëpi” të vendosur më parë nga Gjykata.
Gjatë periudhës hetimore janë sekuestruar rreth 100 gramë kokainë, 2200 tableta ekstazi (MDMA) dhe 11 aparate celularë, duke shënuar një goditje të rëndësishme ndaj trafikut të drogës në kryeqytet.
Shtetasit e arrestuar përfshijnë:
- E. H., 39 vjeç
- A. N., 37 vjeç
- K. M., 30 vjeç
- R. L., 29 vjeç
- E. S., 34 vjeç
- E. H., 26 vjeç
- M. B., 31 vjeç
- A. Gj., 36 vjeç
- F. K., 32 vjeç
Hetimet zbuluan se ata shpërndanin doza droge brenda ambienteve të lokaleve, duke rrezikuar sigurinë publike dhe shëndetin e qytetarëve. Në periudhën hetimore, gjithashtu u arrestuan edhe E. L., 42 vjeç dhe B. L., 59 vjeç, të cilëve iu sekuestruan 2200 tableta ekstazi.
Policia apelon qytetarët të denoncojnë çdo aktivitet të dyshimtë, ndërsa vijon puna për kapjen e dy shtetasve të tjerë të shpallur në kërkim dhe për dokumentimin ligjor të plotë të kësaj veprimtarie kriminale.
Materialet procedurale janë dorëzuar në Prokurorinë e Tiranës për veprime të mëtejshme.
