Kreu i Grupit Parlamentar të Partisë Socialiste, Taulant Balla, ka reaguar pas vendimit të Grupit Parlamentar të Partia Demokratike e Shqipërisë për të bojkotuar seancën plenare të ditës së martë në Kuvend.
Përmes një deklarate, Balla shprehu keqardhje për këtë vendim, duke theksuar se bojkotimi vjen pikërisht në një moment kur në rendin e ditës është propozuar një projekt-rezolutë për shpalljen e Republika Islamike e Iranit si shtet sponsor të terrorizmit dhe shtet që përdor mjete terroriste.
Sipas tij, pretendimi i opozitës se kjo çështje është një “agjendë personale” është i pajustifikuar. Balla theksoi se Shqipëria duhet të mbajë një qëndrim të qartë përkrah Shtetet e Bashkuara të Amerikës lidhur me veprimet terroriste që i atribuohen Iranit.
“Keqardhje për njoftimin se Grupi Parlamentar i Partisë Demokratike do të bojkotojë seancën e nesërme të Kuvendit me pretekstin se është propozuar një projekt-rezolutë për shpalljen e Republikës Islamike të Iranit si shtet sponsor të terrorizmit. Sipas tyre, nevoja e menjëhershme e një qëndrimi të Shqipërisë përkrah SHBA ndaj veprimeve terroriste të Iranit qenka një agjendë personale”, shprehet Balla.
Ai hodhi poshtë gjithashtu pretendimet e opozitës se seanca është thirrur në kundërshtim me rregulloren e Kuvendit, duke theksuar se ajo është propozuar që më 18 shkurt 2026 në Konferencën e Kryetarëve dhe është miratuar me vendim të seancës plenare një muaj më parë.
Sipas Ballës, sqarimet për urgjencën e kësaj rezolute do të jepen në mbledhjen e radhës të Konferencës së Kryetarëve, ndërsa i bëri thirrje opozitës që të reflektojë dhe të marrë pjesë në seancë.
“Nëse dikush ju ka urdhëruar të bojkotoni nesër seancën, nuk jua dashka të mirën ju dhe Shqipërisë”, përfundon reagimi i tij.
