VLORË – Kryeministri Edi Rama deklaroi se investimi prej 4 miliardë dollarësh që pritet të realizohet në zonën e Zvërnecit do të ketë një ndikim të madh në zhvillimin ekonomik të Shqipërisë, duke e cilësuar atë si një “bekim” për të gjithë vendin.
Gjatë një takimi me socialistët në Vlorë, në kuadër të 35-vjetorit të Partisë Socialiste, Rama mbrojti projektin që ka nxitur debate dhe protesta në disa qytete të vendit, duke argumentuar se investime të kësaj përmase sjellin përfitime që shtrihen përtej kufijve të zonës ku realizohen.
Sipas tij, ndikimi ekonomik i projekteve të mëdha nuk kufizohet vetëm te ndërtimi i hoteleve dhe vilave luksoze, por përhapet në sektorë të ndryshëm të ekonomisë, duke krijuar vende pune, rritur kërkesën për shërbime dhe gjeneruar të ardhura të reja për bizneset lokale dhe kombëtare.
“Investimi 4 miliardë dollarë në Zvërnec do të jetë bekim për ekonominë e gjithë Shqipërisë. Ai nuk do të sjellë vetëm para dhe ndërtime, por një vlerë të shumëfishuar në të gjithë komponentët e ekonomisë”, u shpreh Rama.
Kryeministri solli si shembull zhvillimin e qytetit të Tivatit në Mal të Zi, duke argumentuar se investimet strategjike mund të transformojnë rrënjësisht ekonominë dhe profilin turistik të një vendi.
Në fjalën e tij, Rama theksoi se zhvillimi vjen nga projekte ambicioze dhe vizione afatgjata, ndërsa kritikoi qasjet që, sipas tij, pengojnë investimet dhe mbyllin vendin ndaj mundësive të reja ekonomike.
Deklaratat e kryeministrit vijnë në një kohë kur projekti në Zvërnec vijon të kundërshtohet nga protestues në Tiranë, Vlorë, Durrës, Elbasan dhe qytete të tjera, të cilët kërkojnë transparencë më të madhe dhe rishikim të politikave që lidhen me investimet strategjike dhe zonat e mbrojtura.
Debati për projektin në Zvërnec mbetet një nga çështjet më të diskutuara në vend, duke përplasur argumentet e qeverisë për zhvillim ekonomik me shqetësimet e kundërshtarëve për ndikimin në mjedis dhe interesin publik.
