Senatorët amerikanë në Shqipëri, takim me kreun e SPAK dhe përfaqësuesit e opozitës, por jo me Berishën

Në vendin tonë, senatorët u takuan me Presidentin Bajram Begaj, drejtuesit e institucioneve të reja të drejtësisë, si dhe përfaqësues të opozitës.

Në takimet në Tiranë, ata shoqëroheshin nga ambasadori i Shteteve të Bashkuara, Eric Wendt. Në fokus të turit ballkanik të dy senatorëve amerikanë janë siguria, integriteti euroatlantik, bashkëpunimi me NATO-n dhe sundimi i ligjit.

Jeanne Shaheen dhe Dick Durbin, së bashku me ambasadorin Eric Wendt, takuan në zyrat e tyre kreun e SPAK, Klodjan Braho, dhe atë të BKH, Joni Keta.

Për ambasadorin e ri amerikan, Wendt, kjo ishte ndalesa e dytë në SPAK brenda pak ditëve, pasi ai zhvilloi takime me drejtuesit e Prokurorisë së Posaçme menjëherë pas marrjes së detyrës në krye të misionit diplomatik amerikan në Tiranë.

Gjatë takimit me Kreun e Shtetit Shqiptar, shoqëruar nga ambasadori Wendt, dy senatorët amerikanë u vlerësuan me dekoratën e lartë “Komandar i Urdhrit Suprem të Shqiponjës”, për kontributin e tyre.

Gjatë qëndrimit në Shqipëri, senatorët amerikanë dhe ambasadori Eric Wendt takuan dhe përfaqësues të kampit opozitar, përfshirë deputetët e Partisë Demokratike, Jorida Tabaku, Oerd Bylykbashi dhe Ivi Kason, ku mësohet se opozitarët kanë ngritur shqetësimet e tyre për mënyrën e qeverisjes së vend.

Diplomatët amerikanë kanë zhvilluar takim dhe me kreun e partisë “Mundësia”, Agron Shehaj, si dhe deputeten Marjana Koçeku, e cila është e pavarur pas largimit nga Partia Socialiste.

Senatorët amerikanë dhe ambasadori Eric Wendt kanë shmangur në takimet e tyre në Tiranë kreun e opozitës, Sali Berisha.

Mësohet se pas takimeve në Shqipëri, dy senatorët amerikanë kanë udhëtuar drejt Kosovës, për t’u takuar me politikën e vendit fqinj.

Lexo edhe

Ambasadori i ri amerikan Eric Wendt zhvillon takimin e parë me Edi Ramën

Ambasadori amerikan takon kreun e SPAK-ut, më herët zhvilloi takim edhe me opozitën