Kryeministri Rama mbajti një fjalë në prezantimin e 5 projekteve për konkursin e “Tirana Fountain Plaza” që synon rikonceptimin e “Parkut Rinia” në kryeqytet.
Nuk mund të rri dot sot pa thënë se unë vazhdoj të besoj se rruga që kemi zgjedhur për të ftuar në Shqipëri dhe përfshirë në këtë fazë historike ëndrrash dhe ambiciesh të mëdha arkitektë ndërkombëtarë, është rruga më e mirë për të nesërmen. Duke qenë se kjo rrugë është vënë nën agresionin e një pjese të caktuar apo medias së interesuar ndërkombëtare, dua të ndaj me ju disa shkëmbime që i kemi pasur në ditët e fundit me një gazetar të njohur që paraqitet si kritik i arkitekturës që kishte çuar një sërë pyetjesh që në këndvështrimin tim janë të pabesueshme për nga sipërfaqësia dhe mendjelehtësia. Nuk është ai fajtori, por mënyra krejt e shtrembër e të parit”, tha Rama.
Rama mohoi se bëhet fjalë për dëmtim të natyrës së parkut.“Duhet të ndikojë në rigjenerimin e vetë parkut pa prekur asgjë që natyra aty ka, por duke shtuar”, tha Rama.
Më tej iu adresua edhe kritikave se ka pasur qytetarë që janë nxjerrë me forcë nga banesat.“Nuk ka ndodhur në Shqipëri, asnjëherë në asnjë rast dhe për asnjë arsye që të bëhet nxjerrja me forcë e askujt nga shtëpia për të zhvilluar një projekt privat. Asnjë pronari nuk i është penguar liria e tij nëse do apo jo të zhvillojë. Kemi dhe historinë me zaptues të pronave që janë pjesë e proceseve të legalizimeve dhe ligji është shumë i qartë: asnjëherë s’kemi mbajtur anën e tyre nëse nuk ka një kontratë qiraje për personin që është aty”, u shpreh kryeministri.
Ndërtimi pa rregulla s’është aspak opsion, vijoi Rama duke theksuar se qasjet agresive janë thjesht xhelozi.“Ajo që është kulmi në këtë qasje është që arkitektët e huaj vijnë në Shqipëri për të bërë art-washing bulldozer politics dhe për të zhvilluar gjëra që janë jashtë standardeve. E vërteta është ndryshe. Kemi pasur shumë diskutime për pengesat, por nuk do të thotë që ne në Shqipëri ndërtojmë pa rregulla apo bëjmë diçka që në vende të tjera do të ishte e papranueshme apo e palejueshme. Ka diçka shumë të qartë për mua në këtë qasje agresive: xhelozia. Është xhelozia e njerëzve mediokër dhe që kapen pas nacionalizmit, pasaportës, faktit që janë pjesë e komunitetit lokal dhe jo pas profesionit, argumenteve dhe mundësisë për të qenë konkurrues”, tha kryeministri.
Në fund, ai përmbylli se megjithëse Shqipëria është një universitet i hapur për arkitektët e rinj, mungon specializimi në ndërtimin e kullave.“Ndërtimi i kullave është kaq kompleks, delikat dhe kaq shumë profesionistë të bërë bashkë saqë duhet ta pranojmë se ne nuk kemi akoma kapacitetin dhe dijet”, tha Rama.
Në konkurs marrin pjesë 5 studio arkitekture: Barozzi Veiga nga Spanja, Bjarke Ingels Group dhe Cobe nga Danimarka, l’AUC dhe Julien De Smedt Architects nga Franca.
Lexo edhe
Takimi Rama–von der Leyen/ Protestuesit përplasen me policinë në bulevard, një i shoqëruar
Vlora Hysenin e ka emëruar Rama, ndaj duhet të japë llogari, Bardhi kërkon debat në Kuvend
