Një person që jeton në zonën e Shënkollit në Lezhë dyshohet se ishte objektiv i një atentati të planifikuar me pagesë. Hetimet për ngjarjen, për të cilën policia ndaloi tre persona rreth dy javë më parë, kanë zbuluar detaje të reja mbi mënyrën se si dyshohet se do të kryhej krimi.
Sipas të dhënave hetimore, njëri prej tre të ndaluarve, Vinçesk Pirolli, Kristian Ymeri dhe Eden Tarja, dyshohet se do të përfitonte 10 mijë euro për të ndihmuar në largimin e dy të tjerëve pasi këta të fundit të kryenin vrasjen.
Alarmi për policinë u ngrit pas konstatimit të një motomjeti tip “karkalec”, me të cilin dy persona të maskuar lëviznin në aksin e vjetër që lidh Lezhën me Shkodrën. Pas sinjalizimit, shërbimet policore nisën kontrollet në terren për identifikimin e tyre dhe të mjetit.
Gjatë vëzhgimit, hetuesit ndaluan një automjet tip “Volkswagen Polo”, brenda të cilit ndodheshin tre personat e dyshuar. Sipas të dhënave të hetimit, dy prej tyre kishin rroba të lagura, çka ngriti dyshimet se mund të kishin qenë drejtuesit e motomjetit që ishte parë në zonë.
Kontrollet e mëtejshme në një banesë në zonën e Barbullushit çuan në gjetjen e motorit. Nga verifikimet rezultoi se ai ishte i njëjti motomjet që dyshohet se kishte lëvizur në rrugët e Lezhës. Sipas të dhënave të sistemit, motori rezultonte i vjedhur ose i trafikuar në Suedi më 22 qershor 2025.
Edhe automjeti “Volkswagen Polo” kishte një tjetër gjurmë: rezultonte i marrë me qira në një agjenci pranë zonës së Kamzës.
Pesë telefona nën hetim
Për të zbuluar më shumë mbi aktivitetin e dyshuar të tre personave, Policia e Lezhës ka kërkuar autorizimin për hapjen dhe këqyrjen e pesë aparateve celularë.
Hetuesit synojnë të kontrollojnë komunikimet dhe rrjetet sociale, si dhe të rikuperojnë, nëse është teknikisht e mundur, biseda apo mesazhe të fshira që mund të ndihmojnë në dokumentimin e planit të dyshuar.
Hetimet po shtrihen edhe në pista të tjera. Sipas të dhënave hetimore, ekzistojnë dyshime për lidhje të mundshme të personave të ndaluar me ngjarje të tjera kriminale, mes tyre vrasja e njohur si ajo e “Tanit të Ruzhdiut” në Sarandë dhe një tjetër ngjarje në zonën e Mirditës.
Megjithatë, këto dyshime mbeten pjesë e hetimit dhe nuk përbëjnë konfirmim të përfshirjes së personave të ndaluar në ngjarjet e tjera.
Identiteti i personit që dyshohet se ishte shënjestër e atentatit në Shënkoll dhe motivet e mundshme të planit mbeten ndër çështjet që pritet të sqarohen nga hetimet.
Lexo edhe
(EMRAT)Tritol poshtë sediljes së shoferit, zbardhet atentati që vrau Beqir Devollin në Gjirokastër
Atentati i parandaluar në Lezhë, 3 në burg! Dyshohen edhe për 3 vrasje të tjera
