Sali Berisha e ka cilësuar në Kuvend situatën e krijuar pas hetimeve ndaj ish-drejtoreshës së SHISH, Vlora Hyseni, si një goditje të rëndë për sigurinë kombëtare dhe reputacionin e Shqipërisë. Kreu i PD-së kërkoi dorëheqjen e Edi Ramës, ndërsa iu drejtua ministres së Shtetit për Marrëdhëniet me Parlamentin, Erjona Ismaili, me një pyetje të drejtpërdrejtë për Ergys Agasin.
Berisha tha se, sipas tij, të dhënat sensitive që Shqipëria merr si vend anëtar i NATO-s janë cenuar dhe e lidhi këtë me hetimet që kanë përfshirë Hysenin dhe Agasin.
Ai përsëriti kërkesën për dorëheqjen e kryeministrit Edi Rama, duke e akuzuar politikisht për situatën e krijuar.
Më pas, Berisha iu drejtua ministres Ismaili dhe ngriti publikisht një pretendim lidhur me një të dyshuar lidhje të saj me zyrën e Ergys Agasit.
“Keni kaluar ju, zonjë, nga zyra e Ergysit? Të ka shërbyer ajo zyrë për t’u ngjitur si deputete në Parlament apo jo?”, tha Berisha.
Ai e përsëriti pyetjen duke kërkuar që ministrja t’u përgjigjej qytetarëve:
“Kjo zonja ka kaluar nga zyra e Agasit apo s’ka kaluar? Këtë thuaju shqiptarëve.”
Berisha e cilësoi situatën si një ditë turpi dhe kërkoi transparencë të plotë për çështjen.
“Ndaj dhe është jetike që të bëhet transparencë e plotë para qytetarëve shqiptarë të këtij skandali botëror! Kjo është goditja më fatale për reputacionin e Shqipërisë!”, deklaroi kreu i PD-së.
Në fjalën e tij, Berisha e lidhi çështjen me sigurinë kombëtare dhe me rolin që, sipas tij, duhet të kenë institucionet përballë zhvillimeve të fundit. Deklaratat e tij për kontrollin e supozuar të Agasit mbi institucione dhe sekretet shtetërore janë pretendime politike dhe nuk përbëjnë konstatime gjyqësore të formës së prerë.
Çështja vjen në një moment kur ish-drejtoresha e SHISH, Vlora Hyseni, ndodhet nën masën e arrestit në shtëpi dhe pezullimit nga detyra, ndërsa hetimet e SPAK përfshijnë edhe persona të tjerë të dyshuar për lidhje me Ergys Agasin.
Lexo edhe:
PD NUK BOJKOTON KUVENDIN/ Berisha: Ramës do t’i përgjigjemi në Parlament
