Tre persona janë identifikuar nga Policia e Fierit si të dyshuar për zjarrvënie në disa zona të qarkut. Dy prej tyre janë arrestuar, ndërsa një tjetër po procedohet në gjendje të lirë.
Policia e Fierit ka arrestuar dy persona dhe ka proceduar penalisht një tjetër, të dyshuar për zjarrvënie në zona të ndryshme të qarkut.
Pas marrjes së njoftimeve për disa vatra zjarri, strukturat e Komisariatit të Policisë Fier, në bashkëpunim me Drejtorinë Vendore të Policisë Fier, kanë kryer veprime hetimore dhe operacionale për identifikimin e personave të dyshuar.
Në vijim të hetimeve, në pranga kanë përfunduar P. Z., 66 vjeç, i dyshuar për zjarrvënien në fshatin Ade, dhe D. K., 62 vjeç, i dyshuar për zjarrin në fshatin Kashisht.
Ndërkohë, D. M., 35 vjeç, është proceduar penalisht në gjendje të lirë. Ai dyshohet si autor i zjarrvënies në fshatin Drizë.
Sipas Policisë, nga përhapja e flakëve janë dëmtuar sipërfaqe të pyllëzuara, toka bujqësore, pemë frutore dhe ullishte.
Zjarret kanë krijuar gjithashtu rrezik për banesat dhe objektet pranë zonave të përfshira nga flakët, veçanërisht në Drizë dhe në zonën e Apolonisë.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier, për vijimin e hetimeve dhe veprimeve të mëtejshme.
Të tre personat konsiderohen të dyshuar dhe përgjegjësia e tyre do të përcaktohet nga organet e drejtësisë.
Lexo edhe:
Parashikimi i motit për ditën e sotme 23 shtator, kthjellime dhe vranësira
Horoskopi, 23 shtator/ Zbuloni çfarë parashikojnë yjet për secilën shenjë
