Debate dhe tensione janë shënuar në mbledhjen e sotme të Këshillit Bashkiak të Maliqit, ku në rendin e ditës ishte parashikuar diskutimi dhe marrja e një vendimi lidhur me draftligjin e qeverisë për shkrirjen e kësaj bashkie dhe bashkimin e saj me Korçën.
Këshilltarët e opozitës kanë kërkuar që Këshilli Bashkiak të votojë menjëherë kundër draftligjit, duke kundërshtuar ndryshimin e propozuar territorial.
Nga ana tjetër, këshilltarët e shumicës socialiste janë shprehur se nuk janë ende të qartë mbi përmbajtjen e draftligjit dhe kanë kërkuar më shumë kohë për t’u njohur me dokumentin përpara se të marrin një qëndrim.
Për shkak të mosmarrëveshjeve, këshilltarët socialistë kanë vendosur të braktisin sallën e mbledhjeve. Largimi i tyre ka sjellë reagimin e opozitës, e cila ka këmbëngulur që mbledhja dhe procesi i diskutimit të vijojnë.
Situata është tensionuar më tej gjatë zhvillimit të mbledhjes, pasi një qytetar i pranishëm në sallë ka kërkuar gjithashtu vijimin e punimeve dhe, në një moment tensioni, ka shtyrë fizikisht kryetarin e Këshillit Bashkiak.
Ngjarja ka ndodhur në një moment kur debati mbi riorganizimin territorial dhe propozimin për bashkimin e Maliqit me Korçën ka shkaktuar përplasje mes përfaqësuesve të shumicës dhe opozitës në këshill.
Çfarë parashikon drafti?
Draftligji i qeverisë parashikon ndryshime në organizimin territorial, ndërsa në rastin e Maliqit është propozuar shkrirja e bashkisë dhe bashkimi i saj me Bashkinë Korçë.
Përfaqësuesit e opozitës e kundërshtojnë këtë propozim, ndërsa shumica socialiste në Këshillin Bashkiak ka kërkuar kohë për të analizuar përmbajtjen e draftit përpara marrjes së një vendimi.
Zhvillimet në Këshillin Bashkiak të Maliqit pritet të shoqërohen me reagime të mëtejshme, ndërsa debati për riorganizimin territorial vijon.
Lexo edhe:
Patosi në protestë kundër hartës së re territoriale, banorët: Mos e shkrini bashkinë me Fierin
