Gjykata e Posaçme kundër Korrupsionit dhe Krimit të Organizuar ka dhënë vendimin për një dosje të hetuar nga SPAK, që lidhet me një grup të akuzuar për ndihmë në kalimin e paligjshëm të emigrantëve dhe falsifikim dokumentesh.
Në procesin gjyqësor, të zhvilluar me procedurën e gjykimit të shkurtuar, ishin 29 të pandehur.
Me vendimin e datës 3 gusht 2026, GJKKO shpalli fajtor Njazi Ademajn për veprat penale të “Ndihmës për kalim të paligjshëm të kufijve”, me qëllim përfitimi, të kryer në kuadër të një grupi të strukturuar kriminal, si dhe për “Grupin e strukturuar kriminal”.
Gjykata pushoi akuzën ndaj tij për falsifikimin e letërnjoftimeve, pasaportave ose vizave. Pas bashkimit të dënimeve dhe uljes me një të tretën, për shkak të gjykimit të shkurtuar, Ademaj u dënua përfundimisht me 7 vite e 4 muaj burgim, dënim që do ta vuajë në një institucion të sigurisë së lartë.
Fajtor u shpall edhe Ylli Brahimaj, për falsifikim dokumentesh dhe pjesëmarrje në grup të strukturuar kriminal. Pas aplikimit të gjykimit të shkurtuar, ai u dënua me 5 vite burgim, që do ta vuajë në një institucion të sigurisë së lartë.
Në bankën e të akuzuarve ishin edhe Rrezart Domi, Osman Luca, Arsen Caka, Jugert Gashi, Emiljan Marashi dhe Roland Islamaj. Për të pandehurit e tjerë, GJKKO dha vendimet dhe masat përkatëse në varësi të akuzave dhe rolit që u atribuohet në aktivitetin e grupit.
Çështja lidhet me hetimet e SPAK për veprimtarinë e dyshuar të grupit në organizimin e kalimeve të paligjshme të emigrantëve dhe përdorimin e dokumenteve të falsifikuara.
Lexo edhe:
Vrasja e Renis Dobrës, GJKKO pranon kërkesën e SPAK për shtyrjen e hetimeve
Dosja SASPAC, GJKKO liron nga qelia Ermal Kurtulajn: Kalon në arrest shtëpie
