Ministri i Punëve të Brendshme, Besfort Lamallari, ka reaguar për shkeljet e rënda të rregullave të qarkullimit rrugor, duke bërë thirrje për më shumë përgjegjshmëri në timon.
Përmes një postimi në rrjetet sociale, Lamallari publikoi të dhënat e kontrolleve të kryera nga Policia e Shtetit gjatë natës së kaluar.
Sipas tij, pajisjet inteligjente kanë evidentuar 206 raste të automjeteve që lëviznin me shpejtësi nga 150 deri në 212 km/h.
Shkeljet janë konstatuar në segmentet rrugore nga Lezha në Fier, ku shpejtësia maksimale e lejuar është 90 km/h.
Lamallari: Automjeti nuk është armë
Ministri i Brendshëm e cilësoi këtë sjellje si një rrezik serioz për jetën e drejtuesve dhe të gjithë përdoruesve të rrugës.
Sipas tij, drejtimi i automjeteve me shpejtësi ekstreme mund të shkaktojë pasoja të rënda.
“Automjeti nuk është armë!”, theksoi Lamallari në reagimin e tij.
Ai paralajmëroi se nuk do të ketë tolerancë ndaj drejtuesve që i përdorin rrugët si pista garash.
“Rrugët nuk do t’ua lëmë në dorë atyre që sillen si kamikazë”
Lamallari theksoi se teknologjia moderne e Policisë së Shtetit po përdoret për të identifikuar shkeljet e rregullave të qarkullimit.
Sipas tij, ndaj drejtuesve që tejkalojnë ndjeshëm kufijtë e shpejtësisë do të merren masat administrative dhe ligjore përkatëse.
“Rrugët nuk do t’ua lëmë në dorë atyre që sillen si kamikazë në timon”, u shpreh ministri.
Reagimi vjen në kuadër të kontrolleve për rritjen e sigurisë rrugore dhe parandalimin e aksidenteve të shkaktuara nga shpejtësia e lartë.
Lexo edhe:
Lamallari: Shqipëria në nivelin më të ulët historik të vrasjeve me dashje
Lamallari paralajmëron kontrolle kundër zhurmave: “Decibelët shurdhues nuk janë argëtim”
