Prindërit e Refit Buzit, autorit të dyshuar të ngjarjes së rëndë në Vidhisht të Roskovecit, kanë folur për marrëdhënien e djalit të tyre me ish-të fejuarën Rozalinda dhe konfliktet që, sipas tyre, kishin lindur mes dy familjeve.
Sipas prindërve të 35-vjeçarit, Refit Buzi dhe Rozalinda kishin qenë të fejuar prej rreth 9 vitesh. Ata pretendojnë se gjatë kohës që djali i tyre punonte në Angli, ai i dërgonte të ardhura financiare ish-të fejuarës.
Nëna e Buzit ka ngritur pretendimin se paratë që ai dërgonte nuk i shkonin gjithmonë Rozalindës. Sipas saj, kjo situatë kishte sjellë konflikte dhe përplasje mes dy familjeve.
Edhe babai i 35-vjeçarit ka folur për një shumë të konsiderueshme parash. Ai pretendon se djali i tij kishte siguruar rreth 180 mijë paund gjatë viteve që kishte punuar në Angli.
Babai: Nuk menduam se situata do të arrinte deri këtu
Babai i Refit Buzit ka treguar se djali i tij ishte kthyer në Shqipëri prej rreth tre vitesh. Sipas tij, gjatë kësaj periudhe ai ishte kujdesur edhe për shëndetin e të atit.
“Po bënte tre vite që ishte kthyer në Shqipëri. Ishte marrë edhe me mua nëpër spitale. U ngrit herët në mëngjes, mori çiften pas dere dhe nuk e pamë”, ka rrëfyer ai.
Sipas prindërve të tij, konflikti mes dy familjeve kishte zgjatur prej kohësh. Ata pretendojnë se Rozalinda kishte shprehur dëshirën për të vijuar marrëdhënien me Refit Buzin, por problemet mes familjeve kishin ndikuar në lidhjen e tyre.
Këto janë pretendime të familjes së autorit të dyshuar dhe mbeten pjesë e dëshmive që po shqyrtohen nga grupi hetimor.
Ngjarja e rëndë në Vidhisht
Ngjarja ndodhi në orët e para të mëngjesit në fshatin Vidhisht të Roskovecit.
Sipas Policisë së Shtetit, Refit Buzi dyshohet se qëlloi me armë gjahu ish-vjehrrin e tij, Kosta Plaka, 58 vjeç, i cili humbi jetën. Nëna e Rozalindës, Belere Plaka, rreth 55 vjeçe, mbeti e plagosur.
Pas ngjarjes, 35-vjeçari dyshohet se u largua nga vendi i krimit bashkë me ish-të fejuarën. Për disa orë, forcat e Policisë dhe RENEA zhvilluan negociata për dorëzimin e tij.
Rozalinda u lirua më pas, ndërsa vijuan veprimet e policisë për kapjen e Refit Buzit dhe zbardhjen e plotë të rrethanave të ngjarjes.
Hetimet për motivin e krimit dhe dinamikën e plotë të ngjarjes vijojnë.
Rrethimi nga RENEA në Fier, vijojnë negociatat me 35-vjeçarin që dyshohet se vrau ish-vjehrrin
