Një ngjarje e rëndë është regjistruar në Mirditë, ku një 45-vjeçar ka humbur jetën pasi ka rënë në kontakt me energjinë elektrike.
Ngjarja ka ndodhur në fshatin Përlat i Epërm, ku viktima, banues në Durrës, ndodhej pranë banesës së vjehrrit të tij.
Sipas informacioneve paraprake, 45-vjeçari dyshohet se është ngjitur në një shtyllë elektrike për të verifikuar një problem me furnizimin me energji elektrike në banesë.
Nga të dhënat e para hetimore mësohet se linja elektrike ka qenë nën tension dhe për pasojë 45-vjeçari ka rënë në kontakt me energjinë elektrike, duke pësuar dëmtime fatale.
Si pasojë e goditjes elektrike, ai ka humbur jetën në vendngjarje.
Menjëherë pas marrjes së njoftimit, në vendngjarje kanë mbërritur shërbimet e policisë dhe grupi hetimor, të cilët kanë kryer veprimet e para procedurale.
Autoritetet po punojnë për të zbardhur plotësisht rrethanat e ngjarjes dhe për të përcaktuar të gjitha shkaqet që çuan në këtë aksident tragjik.
Ndërkohë, pritet edhe njoftimi zyrtar i policisë për detaje të mëtejshme lidhur me ngjarjen.
