Kryeministri Edi Rama ka vijuar mbrojtjen e projektit në Zvërnec, duke reaguar ashpër ndaj kritikave dhe debatit publik të krijuar rreth investimit.
Në deklaratën e tij, Rama tha se presioni dhe akuzat e ngritura në lidhje me projektin e kanë bërë të reflektojë për rolin e tij në drejtimin e vendit, duke përmendur edhe mundësinë e tërheqjes.
“Thënë këto, ndjesë nëse jam i drejtpërdrejtë… më kanë bërë të mendoj që të iki në shtëpi dhe t’ju lë juve të mbroheni vetë nga të huajt”, u shpreh kryeministri, duke e lidhur këtë reagim me klimën e debatit publik dhe akuzat që, sipas tij, janë të pabazuara.
Ai shtoi se ndjen përgjegjësi për drejtimin e vendit dhe për projektet strategjike që, sipas tij, synojnë zhvillimin ekonomik dhe rritjen e profilit turistik të Shqipërisë në rajon.
Rama theksoi gjithashtu se kundërshtimet ndaj projektit në Zvërnec po bazohen në dezinformim dhe interpretime të gabuara, duke insistuar se procesi është pjesë e një vizioni më të gjerë për investimet në vend.
Debati për projektin vijon të jetë i ndezur, mes protestave, reagimeve politike dhe diskutimeve për ndikimin mjedisor dhe pronësor në zonën e Zvërnecit.
