Një studim i publikuar në revistën shkencore JAMA sugjeron se personat që konsumojnë rregullisht kafeinë kanë një rrezik më të ulët për zhvillimin e demencës, krahasuar me ata që pinë pak ose aspak kafe apo çaj.
Sipas të dhënave të studimit, pjesëmarrësit me konsumin më të lartë të kafeinës kishin rreth 18% më pak gjasa të preken nga demenca. Ata raportuan gjithashtu më pak probleme me kujtesën dhe funksionet njohëse, bazuar në vetëvlerësimet e tyre.
Efekti pozitiv u vu re te personat që pinin kafe dhe çaj me kafeinë, ndërsa pijet pa kafeinë nuk treguan përfitime të ngjashme. Rezultatet më të dukshme u konstatuan te individët që konsumonin dy deri në tre filxhanë kafe në ditë ose një deri në dy filxhanë çaji.
Studiuesit shpjegojnë se përbërës si kafeina dhe polifenolët mund të ndihmojnë në uljen e inflamacionit në qelizat nervore dhe në mbrojtjen e trurit nga dëmtimet që lidhen me procesin e plakjes.
Megjithatë, autorët theksojnë se studimi nuk provon një lidhje të drejtpërdrejtë shkak–pasojë dhe se efekti mbrojtës është relativisht i moderuar. Kafeja dhe çaji nuk e parandalojnë demencën, por mund të jenë pjesë e një stili jetese që ndikon pozitivisht në shëndetin e trurit.
“Përveç kafesë dhe çajit, aktiviteti fizik, ushqyerja e shëndetshme dhe gjumi i mjaftueshëm mbeten thelbësore për ruajtjen e shëndetit mendor,” u shpreh Daniel Wang nga Harvard Medical School.
Studimi tregon gjithashtu se përfitimet e vërejtura ishin të ngjashme edhe te personat me predispozicion gjenetik për demencë, duke përforcuar idenë se stili i jetesës luan një rol të rëndësishëm në shëndetin e trurit.
Demenca mbetet një nga sëmundjet më të përhapura te moshat e treta dhe, në mungesë të një kure, kërkimet po përqendrohen gjithnjë e më shumë te faktorët e përditshëm që mund të ndihmojnë në uljen e rrezikut.
