Një lajm i ndjeshëm ka prekur fansat e këngëtares së njohur shqiptare Beatrix Ramosaj. Artistja ka bërë të ditur se nëna e saj është diagnostikuar me kancer dhe ka nisur trajtimin mjekësor.
Beatrix ka zgjedhur ta ndajë këtë moment të vështirë përmes një postimi emocional në InstaStory, ku shpreh dashurinë, forcën dhe lidhjen e thellë me të ëmën.
“Nuk jam aty për të ta mbajtur dorën tani, por po të mbaj me gjithë zemrën time, mami. Çdo frymëmarrje, çdo minutë”, shkruan këngëtarja, duke përcjellë emocion dhe ndjeshmëri.
Ajo njofton gjithashtu se një tjetër fazë e rëndësishme e trajtimit është përfunduar me sukses, duke shprehur krenarinë për forcën dhe qëndresën e nënës së saj.
“Një tjetër hap i madh u përfundua sot. Jam kaq krenare për forcën tënde, mama. Çdo ditë një hap më afër”, shprehet Beatrix.
Në mesazhin e saj, artistja falënderon publikun dhe miqtë për mbështetjen e vazhdueshme gjatë kësaj periudhe të vështirë për familjen.
“Mirënjohëse për çdo mesazh, çdo lutje, çdo fjalë të mirë. Faleminderit që na rrethoni me kaq shumë dritë”, shkruan ajo.
Në fund, Beatrix kërkon mirëkuptim për mungesën e përgjigjeve personale, duke theksuar se mbështetja e ndjekësve ka një vlerë të madhe për të dhe familjen e saj.
“Më falni nëse nuk mund t’u përgjigjem të gjithëve tani, por mbështetjen tuaj e mbaj me vete”, përfundon këngëtarja.
Mesazhi i saj është pritur me reagime të shumta mbështetjeje dhe solidariteti nga fansat dhe figura publike, të cilët i kanë uruar forcë dhe shërim të shpejtë nënës së artistes.
