Tetë persona kanë përfunduar në pranga në lidhje me arratisjen e bujshme të të paraburgosurit Altin Ndoci nga Spitali Rajonal i Durrësit, një ngjarje që ka tronditur rëndë sistemin e sigurisë dhe ka ngritur pikëpyetje serioze mbi bashkëpunimin e brendshëm institucional.
Mes të arrestuarve ka zyrtarë kyç të shëndetësisë dhe policisë, çka e shndërron këtë ngjarje nga një “dështim procedural” në dyshim për skemë të mirëorganizuar.
Autoritetet kanë arrestuar:
Aulon Çuko – kryeinfermier në Spitalin e Durrësit
Desdemon Pazaj – zëvendësshef i komanduar i Policisë
Dorjan Saraçi – efektiv policie
Sal Ferollari – efektiv policie
Preng Marvataj – efektiv policie
Fatjon Baçi – efektiv policie
Aranit Çela – efektiv policie
Violeta Uka – shtetase civile
Të gjithë dyshohet se kanë lehtësuar ose mosvepruar qëllimisht gjatë momentit të arratisjes.
Ngjarja ndodhi mesditën e një dite më parë, kur Altin Ndoci, i shoqëruar nga efektivë policie për një vizitë mjekësore, u largua nga ambientet e spitalit të Durrësit dhe u zhduk pa lënë gjurmë.
Drejtoria e Përgjithshme e Burgjeve konfirmoi ngjarjen, por pa dhënë shpjegime konkrete mbi mënyrën se si një i paraburgosur me rrezikshmëri të lartë mundi të largohej nga një ambient që, sipas tyre, është i pajisur me masa sigurie.
“Arratisja ka ndodhur brenda godinës së përshtatur për trajtimin e të burgosurve”, thuhet në njoftimin zyrtar.
Por pikërisht ky fakt e bën ngjarjen edhe më të rëndë.
Altin Ndoci është një emër i njohur për drejtësinë, i arrestuar që në vitin 2020 dhe i akuzuar për:
vrasje, pjesëmarrje në organizatë kriminale, përfshirje në atentate mafioze
Në tetor 2025, SPAK e dërgoi për gjykim si pjesë e organizatës kriminale ku akuzohen edhe vëllezërit Çopja.
Ndoci është përmendur gjithashtu nga të penduar të drejtësisë si pjesëmarrës aktiv në konfliktet mes grupeve kriminale në vend.
Si u arratis një i paraburgosur i rrezikshëm nga një repart i sigurisë?
Pse përfshihen në këtë ngjarje policë dhe staf shëndetësor?
A ishte kjo një arratisje spontane apo e planifikuar?
Heshtja e institucioneve mbi detajet kyçe vetëm sa forcon dyshimet për bashkëpunim të brendshëm.
