Gjykata e Posaçme Kundër Korrupsionit dhe Krimit të Organizuar (GJKKO) ka ndryshuar masën e sigurisë për dy ish-zyrtarët e ARRSH-së, Gentian Gjyli dhe Erald Elezi, të cilët akuzohen për “shkelje të barazisë së pjesëmarrësve në tendera” të kryer në bashkëpunim.
Gjyli dhe Elezi, të cilët ndodheshin nën masën e “arrestit në shtëpi”, tashmë do të jenë nën masën “detyrim për t’u paraqitur”, së bashku me ndalimin e daljes jashtë vendit.
Ndryshimi i masës për shkak të tejkalimit të afateve
Sipas vendimit të GJKKO-së, ndryshimi i masës së sigurisë është bërë për shkak të tejkalimit të afateve të parashikuara nga ligji.
Dy ish-zyrtarët e ARRSH-së vijojnë të jenë nën hetim për veprën penale të shkeljes së barazisë së pjesëmarrësve në tendera, kryer në bashkëpunim.
Masa e re e sigurisë u lejon atyre të qëndrojnë në liri, por me detyrimin për t’u paraqitur pranë autoriteteve sipas përcaktimeve të gjykatës dhe me kufizimin për të mos dalë jashtë territorit të Shqipërisë.
Hetimet për çështjen vijojnë nga autoritetet kompetente.
Lexo edhe:
Gjyli sfidon GJKKO-në: Pse gratë zyrtare hetohen të lira, ndërsa unë jo?
