Kristian Ymeri, alias “Shkambi”, Vinccesk Piroli dhe Elden Tarja janë tre personat e arrestuar në Lezhë, të dyshuar se po përgatiteshin të kryenin një vrasje. Në një nga telefonat e sekuestruar dyshohet se është gjetur fotografia e një banese që mund të lidhet me hetimet.
Detaje të reja janë zbardhur nga hetimet për tre personat e arrestuar në Lezhë, të dyshuar për sigurimin e kushteve për kryerjen e një vrasjeje. Të arrestuarit janë Kristian Ymeri, i njohur edhe me aliasin “Shkambi”, Vinccesk Piroli dhe Elden Tarja.
Sipas informacioneve të raportuara nga gazetari Elton Qyno, në njërin prej telefonave të sekuestruar nga policia është gjetur fotografia e një banese në qytetin e Lezhës. Sipas burimeve të cituara, banesa i përket një personi me inicialet E.T., i përshkruar si personazh i njohur në qytet.
Po sipas këtyre burimeve, personi në fjalë ndodhej jashtë Shqipërisë prej rreth një muaji në kohën kur po zhvilloheshin ngjarjet që po hetohen.
Kush dyshohet se ishte objektivi?
Hetimet, sipas informacioneve të bëra publike, po shqyrtojnë edhe mundësinë që objektiv i planit të dyshuar të ketë qenë një person me inicialet P.Gj. Ky i fundit, sipas raportimeve, i ka shpëtuar më parë dy atentateve ku përmendet edhe personi me inicialet E.T.
Megjithatë, identiteti i objektivit dhe motivet e mundshme të ngjarjes mbeten pjesë e hetimit dhe nuk janë konfirmuar përfundimisht nga autoritetet.
Sipas dyshimeve të policisë, tre personat lëviznin të armatosur me një motor të raportuar si të vjedhur në Suedi. Ata dyshohet se po përgatiteshin të kryenin atentatin në orët e para të mëngjesit, por plani nuk u realizua, pasi nuk arritën të identifikonin objektivin.
SPAK po shqyrton lidhjet e mundshme me një grup kriminal
Paralelisht me hetimet e Prokurorisë së Lezhës, çështja ka tërhequr edhe vëmendjen e Prokurorisë së Posaçme kundër Korrupsionit dhe Krimit të Organizuar (SPAK), e cila, sipas raportimeve, po shqyrton mundësinë e verifikimit të lidhjeve të të arrestuarve me një grup të dyshuar kriminal.
Për momentin, hetimet nën drejtimin e Prokurorisë së Lezhës vijojnë për veprat penale “Mbajtja pa leje e armëve dhe municioneve”, “Sigurimi i kushteve për kryerjen e vrasjes” dhe “Trafikimi i mjeteve motorike”.
Pas analizimit të provave dhe të dhënave të mbledhura, pritet të vlerësohet nëse çështja do të kalojë në kompetencën e SPAK-ut.
Tre të arrestuarit pritet të dalin para Gjykatës së Lezhës për t’u njohur me masën e sigurisë. Hetimet vijojnë për të sqaruar rolin e secilit dhe rrethanat e plota të rastit.
Lexo edhe
Atentati ishte planifikuar të bëhej në mëngjes/ Tre të arrestuarit në Lezhë nuk gjetën objektivin
Po planifikonin atentat në Lezhë/ Policia ndalon 3 persona me armë dhe motorr të vjedhur (EMRAT)
