Një skemë e re mashtrimi kibernetik po qarkullon prej disa ditësh në aplikacionin WhatsApp dhe ka prekur edhe përdorues në Shqipëri, duke ngritur shqetësime serioze për sigurinë e të dhënave personale.

Mesazhi, i njohur si “mashtrimi i balerinës”, i fton qytetarët të klikojnë një link për të votuar në një konkurs vallëzimi për fëmijë, zakonisht me një tekst të tillë:

Reklame

“Përshëndetje! A mund të ndani pak kohë për të votuar Sarën? Ajo është vajza e shoqes sime dhe fituesi merr një vit mësime vallëzimi pa pagesë.”

Në pamje të parë mesazhi duket i padëmshëm, por sipas ekspertëve të sigurisë kibernetike, qëllimi i tij është vjedhja e të dhënave dhe komprometimi i llogarisë WhatsApp.

Pasi përdoruesi klikon linkun, ai ridrejtohet në një faqe që imiton një platformë votimi. Në realitet, kjo faqe shërben për:

marrjen e aksesit në llogarinë WhatsApp të viktimës

vjedhjen e kontakteve dhe bisedave

përdorimin e profilit të infektuar për të dërguar mesazhe të tjera mashtruese

Më pas, nga llogaria e komprometuar dërgohen linke të reja drejt kontakteve të viktimës, shpesh të maskuara si lojëra online apo oferta të rreme, të cilat mund të çojnë edhe në akses në aplikacione bankare ose financiare.

Për shkak se mesazhet dërgohen nga numra realë dhe kontakte të njohura, shumë përdorues bien pre e mashtrimit pa dyshime, duke krijuar një zinxhir të shpejtë përhapjeje.

Specialistët rekomandojnë:

të mos klikohen linke të dyshimta, edhe kur vijnë nga kontakte të njohura

të verifikohet gjithmonë përmbajtja e mesazheve

të aktivizohet verifikimi me dy hapa (two-step verification) në WhatsApp

të kontrollohet rregullisht në sa pajisje është aktive llogaria personale

Autoritetet dhe ekspertët bëjnë thirrje për kujdes maksimal, pasi mashtrimet digjitale po bëhen gjithnjë e më të sofistikuara.

“Voto Sarën”/ Skema mashtruese që po përhapet me link

 

Reklame