Genard dhe Sonida Hajdini, vëlla e motër të njohur gjerësisht në rrjetet sociale për përmbajtjet e tyre virale, janë shtruar në Spitalin Psikiatrik të Tiranës, pas një situate që ka ngritur shqetësime serioze për gjendjen shëndetësore dhe trajtimin e tyre.
Sipas raportimeve zyrtare, shtrimi në spital ka ardhur pas publikimit të disa pamjeve intime të Sonida Hajdinit, të cilat u postuan në rrjete sociale nga vëllai i saj, Genard Hajdini. Pamjet shkaktuan reagime të forta publike dhe alarm për gjendjen e saj psikologjike.
Në një njoftim zyrtar, Ministria e Shëndetësisë bën me dije se pas publikimit të videos në Instagram nga shtetasi G.H., strukturat sociale të Njësisë Administrative nr. 2, së bashku me stafin mjekësor dhe Policinë e Komisariatit nr. 1, kanë kryer vlerësimin e gjendjes së shtetases S.H.
Gjatë intervistimit, Sonida Hajdini ka deklaruar se videoja ishte publikuar me qëllim ndjekjeje virale, pa elementë dhune apo qëllime dashakeqësie. Videoja është fshirë më pas nga vetë Genard Hajdini, pas ndërhyrjes së Policisë.
Aktualisht, Sonida Hajdini po merr trajtim mjekësor të specializuar, ndërsa të dy ndodhen të shtruar në spitalin psikiatrik për ndjekje të mëtejshme.
Autoritetet bëjnë me dije se materialet janë referuar në Prokurori, në përputhje me procedurat ligjore dhe rekomandimet e institucioneve përkatëse.
Ngjarja ka rihapur debatin publik mbi kufijtë e përmbajtjes në rrjetet sociale, mbrojtjen e dinjitetit personal dhe rëndësinë e ndërhyrjes së institucioneve në raste që prekin shëndetin mendor.
