Një ditë pas zjarrit të fuqishëm që përfshiu fshatin Tenë të Mirditës, ajo që ka mbetur pas është një peizazh i shkrumbuar. Brenda pak minutash, flakët përpinë pemë, vreshta, bagëti dhe shpendë, duke kthyer në hi një pjesë të pasurisë së banorëve.
Për fat të mirë, banesat nuk u prekën nga flakët dhe nuk pati humbje njerëzore. Banorët, të cilët ishin evakuuar gjatë përhapjes së zjarrit, janë rikthyer në shtëpitë e tyre.
Por kthimi nuk ka sjellë qetësi. Përkundrazi, përballë tyre është një fshat që nuk ngjan më me atë që lanë pas.
Vreshta, pemë dhe kafshë të shkrumbuara
Kudo që hedh sytë, shihen gjurmët e zjarrit. Vreshta të tëra janë shkrumbuar, ndërsa pemët frutore që ishin në pikun e sezonit tashmë janë kthyer në trungje të zinj.
Arra, kumbulla, fiq dhe pemë të tjera frutore, shumë prej të cilave ishin gati për t’u vjelë, janë djegur.
Bashkë me to janë shkatërruar edhe kafshë e shpendë që banorët i mbanin prej vitesh.
Për shumë familje, këto nuk ishin thjesht pemë apo vreshta. Ishin mundi i një jete, të ardhura dhe një pasuri e krijuar ndër vite.
Tani, pas flakëve, ka mbetur vetëm hiri.
Pa ujë dhe pa energji elektrike
Zjarri nuk ka dëmtuar vetëm tokat bujqësore.
Flakët kanë shkatërruar edhe linjat e furnizimit me energji elektrike. Shtyllat janë djegur, ndërsa disa tuba janë shkrirë nga temperaturat e larta.
Banorët sot janë kthyer në shtëpitë e tyre, por përballen me një tjetër problem: nuk kanë energji elektrike dhe nuk kanë ujë.
Sipas banorëve, një ditë pas zjarrit nuk kishte ende punonjës të OSHEE-së në zonë për të nisur punën për rikthimin e energjisë elektrike. Edhe furnizimi me ujë mbetet një problem i pazgjidhur.
“Shteti ishte në këmbë kur digjej, sot nuk ka askënd”
Banorët tregojnë se në momentet e para të zjarrit pati një mobilizim të madh të strukturave shtetërore dhe emergjencave për të frenuar flakët dhe për të evakuuar banorët.
Por një ditë më pas, kur flakët janë shuar dhe nevojitet evidentimi i dëmeve, situata duket ndryshe.
Në fshat, sipas banorëve, nuk kishte struktura që të evidentonin dëmet e shkaktuara nga zjarri dhe të nisnin vlerësimin e nevojave të familjeve të prekura.
Dhe ndërsa banorët përpiqen të kuptojnë se çfarë u ka mbetur, aroma e tymit vazhdon të ndihet në çdo cep.
Gjithçka që u ndërtua në vite, u zhduk në pak minuta
Zjarri mund të jetë shuar, por pasojat e tij sapo kanë nisur të duken.
Një vresht nuk rikthehet brenda një sezoni. Një pemë frutore që është rritur për vite kërkon sërish vite për t’u bërë produktive. Kafshët dhe shpendët e djegur nuk zëvendësohen thjesht me një investim të ri.
Për banorët e Tenës, humbja nuk matet vetëm në hektarë tokë të djegur. Ajo matet me vite pune, kursime dhe një jetë të tërë të investuar në atë që sot është kthyer në hi.
Sot ata janë kthyer në shtëpitë e tyre, por shpresat duket se janë djegur bashkë me tokën.
Mbi tokat e zeza dhe vreshtat e shkrumbuara ka mbetur vetëm një pyetje: si do të nisin sërish nga e para?
Sepse pas çdo zjarri mbetet hiri. Por në Tenë, bashkë me hirin duket se është kthyer në hi edhe një pjesë e madhe e mundit të një jete.
Lexo edhe
Zjarri në Kodër Rrëshen, ja dëmet që shkaktuan flakët pranë banesave
Zjarr pranë banesave në Kodër Rrëshen, flakët afrohen pranë zonave të banuara
