TIRANË – Pas ndryshimeve të fundit në Bashkinë e Tiranës dhe marrjes së kompetencave të kryetarit Erion Veliaj, strukturat bashkiake kanë zbritur në terren për një aksion të gjerë pastrimi në disa prej zonave më problematike të kryeqytetit.
Ndërhyrjet kanë nisur në Bregun e Lumit, Babrru dhe zonën e Urës së Kamzës, ku grupet e punës po kryejnë pastrimin e hapësirave dhe largimin e mbetjeve.
Në aksion janë angazhuar Drejtoria e Përgjithshme e Pastrim-Gjelbërimit, Policia Bashkiake, Eco Tirana dhe ndërmarrje të tjera në varësi të Bashkisë së Tiranës.
Sipas Bashkisë, aksioni synon të rikthejë normalitetin në zonat problematike të kryeqytetit dhe të përmirësojë situatën e pastërtisë pas sezonit veror.
Një prej zyrtarëve të Bashkisë, gjatë ndërhyrjes në Bregun e Lumit, deklaroi se puna do të vijojë çdo ditë dhe se ekipet do të shtrihen në të gjitha zonat problematike të Tiranës.
“Këtu jemi tek zona e Bregut të Lumit, një nga zonat më problematike të Tiranës. Kemi disa ditë që po vazhdojmë me aksionin e pastrimit, së bashku edhe me ndërmarrjet e tjera të Bashkisë, bazuar në direktivat e kryetarit, për të ndërhyrë në të gjitha pikat problematike, në gjithë Tiranën. Aksionet do të vijojnë çdo ditë. Ne do të jemi në të gjithë pikat problematike, për të ndërhyrë dhe për t’i pastruar ato”, sqarojnë zyrtarët e bashkisë.
Bashkia e Tiranës thekson gjithashtu se, krahas angazhimit të strukturave publike, është i rëndësishëm edhe bashkëpunimi i qytetarëve për ruajtjen e pastërtisë dhe shmangien e hedhjes së mbetjeve në hapësirat publike.
Aksionet e pastrimit pritet të vijojnë në ditët në vazhdim, me ndërhyrje të koordinuara në zona të ndryshme të kryeqytetit.
Synimi i deklaruar nga Bashkia është përmirësimi i situatës së pastërtisë dhe rikthimi i normalitetit në pikat që konsiderohen problematike.
Lexo edhe:
Veliaj shkarkon nënkryetarin e Bashkisë së Tiranës, Blendi Sulaj
Pesë celularë në IEVP Durrës, vjen reagimi: “Mos e lidhni me Erion Veliajn”
