Në Prishtinë u zhvillua një protestë qytetare kundër propozimit për rritjen e çmimit të energjisë elektrike deri në 21%, që sipas qytetarëve do të ketë pasoja të rënda ekonomike për familjet.
Protestuesit u mblodhën para selisë së KEDS-it, pas paralajmërimit të Zyrës së Rregullatorit të Energjisë (ZRRE) për rritjen e tarifave. Në një moment, ngjarja u përshkallëzua kur një i moshuar u shoqërua në polici pasi u hodh tym i kuq, duke rritur tensionet në protestë. Aktivisti Erbilin Ajdini deklaroi se KEDS “për interesat e saj është i gatshëm të ngulfas qytetarët”.
Qytetarët theksuan se me rritjen e çmimeve shumë familje nuk do të kenë mundësi të paguajnë faturat e energjisë, duke rrezikuar të mbeten në errësirë.
Instituti për Politika Zhvillimore (INDEP) ka kërkuar nga ZRRE që të sigurojë mbrojtje reale të konsumatorëve gjatë shqyrtimit të tarifave të energjisë elektrike, duke nënvizuar rëndësinë e një procesi të drejtë dhe transparent.
