Policia Rrugore ka intensifikuar kontrollet në të gjithë vendin gjatë 24 orëve të fundit, me fokus parandalimin e aksidenteve dhe rritjen e sigurisë në rrugë.
Gjatë kontrolleve dhe monitorimeve në akset rrugore, shërbimet e Policisë Rrugore kanë vendosur gjithsej 4 255 masa administrative për shkelje të rregullave të qarkullimit.
Në kuadër të kontrolleve, janë arrestuar edhe 8 drejtues automjetesh. Sipas Policisë, 6 prej tyre janë arrestuar për drejtim të mjetit në gjendje të dehur, ndërsa 2 të tjerë për drejtim pa leje drejtimi.
Mbi 1 mijë drejtues u ndëshkuan për shpejtësi
Një nga shkeljet më të evidentuara gjatë kontrolleve ka qenë tejkalimi i shpejtësisë së lejuar.
Në akset rrugore nacionale janë vendosur 1 331 masa administrative për drejtuesit që kanë tejkaluar normat e lejuara të shpejtësisë.
Policia thekson se shpejtësia është një nga faktorët kryesorë që ndikon në rëndimin e pasojave të aksidenteve rrugore.
Ndërkohë, në zonat urbane janë vendosur 1 530 masa administrative për parkime të gabuara.
Gjithashtu, automjetet e parkuara në korsitë e dedikuara dhe në trotuare janë larguar me mjete ngritëse të Policisë së Shtetit, pasi pengonin lëvizjen e qytetarëve.
Shkeljet e tjera të evidentuara
Gjatë kontrolleve të Policisë Rrugore, janë ndëshkuar edhe drejtues për shkelje të tjera të rregullave të qarkullimit.
Sipas të dhënave zyrtare:
- 332 drejtues janë ndëshkuar për mosvendosjen e kaskës mbrojtëse;
- 126 drejtues janë ndëshkuar për mosvendosjen e rripit të sigurimit;
- 66 drejtues janë ndëshkuar për përdorimin e celularit gjatë drejtimit të automjetit;
- 166 drejtues janë ndëshkuar për parakalime të gabuara;
- 27 drejtues janë ndëshkuar për drejtim të mjetit nën efektin e alkoolit;
- 11 drejtues janë ndëshkuar për zhurma dhe manovra të rrezikshme në qendrat urbane;
- 494 drejtues janë ndëshkuar për shkelje të tjera të konstatuara gjatë monitorimeve.
Shtohen kontrollet gjatë fundjavës
Duke marrë në konsideratë fluksin e shtuar të qarkullimit gjatë fundjavës drejt zonave bregdetare dhe turistike, Policia Rrugore ka shtuar prezencën e shërbimeve në terren.
Kontrollet dhe patrullimet janë shtuar në akset kombëtare, ndërsa monitorimi i qarkullimit po kryhet edhe përmes mjeteve inteligjente.
Policia u ka bërë apel drejtuesve të automjeteve që të tregojnë kujdes maksimal gjatë udhëtimit dhe të respektojnë rregullat e qarkullimit rrugor.
Autoritetet kanë kërkuar që drejtuesit të shmangin shpejtësinë, drejtimin nën efektin e alkoolit dhe çdo sjellje tjetër të rrezikshme që mund të kërcënojë jetën e tyre dhe të përdoruesve të tjerë të rrugës.
Rrugorja “në aksion” me dronë dhe radarë, ndëshkime të forta për shkeljet në trafik














