Episodi i radhës i emisionit “Përtej Traditës”, nën moderimin e gazetarit Shkëlzen Henkoja, ka sjellë një bisedë të veçantë me tre figura të njohura të komunitetit, të cilët përcollën mesazhe të forta për ruajtjen e identitetit kombëtar dhe vlerave shqiptare.
Profesori Astrit Memia u ndal te rëndësia e traditës dhe edukimit, duke theksuar se “kombin e mban gjallë tradita, dija dhe puna e ndershme”, si bazë për një shoqëri të shëndetshme dhe me identitet të fortë.
Nga ana tjetër, ish-nënkryetari i Kuvendit të Kosovës, Bislim Hoti, vuri theksin te përgjegjësia ndaj brezave të rinj, duke u shprehur se “vlerat kombëtare trashëgohen vetëm kur ne i ndajmë me brezat e rinj”.
Ndërsa patrioti dhe mërgimtari nga Zvicra, Idriz Brahimaj, përcolli një mesazh të ndjerë për atdhedashurinë, duke deklaruar se “dashuria për atdheun nuk shuhet kurrë, edhe kur jeton larg tij”.
Emisioni solli një mesazh të qartë dhe frymëzues për rëndësinë e traditës, atdhedashurisë dhe ruajtjes së vlerave të mirëfillta shqiptare në çdo kohë dhe kudo që shqiptarët jetojnë.
