Licencimi i bankës së parë plotësisht digjitale në Shqipëri, “Jet Bank”, është shoqëruar me akuza të forta nga opozita, duke ngritur pikëpyetje mbi transparencën e procesit dhe integritetin e aksionerëve të saj.
Deputeti i Partisë Demokratike, Belind Këlliçi, e ka cilësuar këtë projekt si një “skemë mashtrimi” me prapavijë politike. Sipas tij, Banka e Shqipërisë ka licencuar institucionin financiar pa kryer procesin e detyrueshëm të verifikimit për aksionerët.
Këlliçi pretendon se personat pas “Jet Bank” janë të lidhur me rrjete ndërkombëtare mashtrimi në tregun Forex dhe se disa prej tyre kanë pasur probleme me drejtësinë në vendet e Bashkimit Europian. Ai thekson gjithashtu mungesën e eksperiencës së tyre në sektorin bankar, ndërsa shton se banka është regjistruar në një juridiksion me taksa minimale dhe operon pa sportele fizike.
Një tjetër shqetësim i ngritur nga deputeti lidhet me mungesën e transparencës nga ana e Bankës së Shqipërisë. Sipas tij, prej tre muajsh ai i është drejtuar me pyetje zyrtare Guvernatorit dhe institucioneve përkatëse, por nuk ka marrë asnjë përgjigje, çka sipas tij bie ndesh me detyrimet ligjore ndaj një përfaqësuesi të Kuvendit. Akuzat marrin edhe një dimension politik, pasi Këlliçi pretendon se kjo nismë është mbështetur nga Kryeministri Edi Rama.
Ai e lidh këtë çështje me skandalin e mikrokredive, duke sugjeruar se institucioni rregullator ka qenë nën presion të vazhdueshëm nga qeveria. Këto pretendime janë artikuluar më herët edhe nga kreu i opozitës, Sali Berisha, pa sjellë deri tani një reagim zyrtar nga ana e kryeministrit. Ndërkohë, pavarësisht polemikave, “Jet Bank” ka nisur një fushatë të gjerë marketingu.
Përballë kësaj situate, shtatë deputetë të opozitës kanë firmosur një kërkesë zyrtare për të hetuar çështjen, e cila sipas tyre ngre shqetësime serioze për sigurinë dhe besueshmërinë e sistemit bankar në vend.
