Nga “ndiq paranë” te “të kujt e ke makinën?”/ Policia del në rrugët e Tiranës dhe kontrollon makinat luksoze. Por pyetja është: a po kërkohet vërtet origjina e pasurisë apo thjesht po bëhet një tjetër show për publikun?
Le ta themi troç: të ndalosh një Lamborghini, Ferrari, Bentley apo BMW luksoze dhe të pyesësh shoferin “të kujt e ke makinën?” nuk është hetim financiar. Është thjesht pyetja e parë.
Dhe pikërisht këtu lind pyetja tjetër: pse policia po e shet këtë si një aksion të madh?
Kujt i kërkohet llogari?
Nëse një makinë luksoze është e regjistruar, ka dokumentacion të rregullt, është zhdoganuar, ka paguar detyrimet, siguracionin dhe taksat dhe figuron në emër të një personi apo kompanie, çfarë po zbulon policia duke pyetur shoferin se kujt i përket?
Nuk ka ndonjë ligj që të ndalon t’i japësh makinën tënde një personi tjetër.
Mund të kesh një Ferrari dhe t’ia japësh shokut. Mund të kesh një Range Rover dhe ta drejtojë bashkëshortja. Mund të kesh një BMW luksoze dhe ta përdorë punonjësi i kompanisë.
Problemi nuk është kush është ulur në timon. Problemi është nëse makina është e ligjshme dhe nëse paratë me të cilat është blerë kanë një burim të ligjshëm.
Prandaj, nëse policia vërtet do të “ndjekë paranë”, atëherë pyetjet duhet të jenë shumë më të thella.
Kur ka hyrë makina në Shqipëri?
Ku është zhdoganuar?
Sa është deklaruar vlera e saj?
Kush e ka blerë?
Sa është paguar realisht?
Në emër të kujt është regjistruar?
A janë paguar taksat dhe detyrimet?
Kush ka transferuar paratë?
Nga cila llogari kanë dalë?
A përputhet vlera e makinës me të ardhurat e personit që e zotëron?
Këto janë pyetje që mund të çojnë te një hetim serioz.
Jo “të kujt e ke makinën?”.
Sepse në Shqipëri nuk është ndonjë sekret që makinat luksoze qarkullojnë prej vitesh. Ato shihen çdo ditë në Tiranë, në bregdet, në qytetet turistike dhe në rrugët e vendit.
Dhe nëse policia dyshon se pas tyre fshihen para me origjinë kriminale, le të ndjekë paratë deri në fund.
Jo të bëjë një aksion me kamera, të ndalojë disa makina luksoze, të bëjë disa fotografi dhe pastaj ta shesë si luftë kundër pastrimit të parave.
Sepse shqiptarët nuk kanë nevojë për show.
Kanë nevojë për rezultate.
Nëse një makinë është me dokumente false, konfiskoje.
Nëse është futur në vend në mënyrë të paligjshme, hetoje.
Nëse është blerë me para që nuk justifikohen, ndiq burimin e parave.
Nëse pasuria është produkt i krimit, çoje çështjen deri në fund.
Por nëse makina është e rregullt me dokumente, është regjistruar sipas ligjit dhe personi që e drejton nuk ka kryer asnjë shkelje, çfarë po bëjmë? Po e trajtojmë luksin si krim?
Dhe ndërkohë që policia merret me “të kujt e ke makinën”, në rrugët e Shqipërisë ka probleme shumë më konkrete.
Ka njerëz që drejtojnë të dehur.
Ka drejtues që përdorin telefonin në timon.
Ka persona që qarkullojnë pa patentë.
Ka makina që ecin me shpejtësi absurde dhe kthehen në rrezik për këdo që ndodhet në rrugë.
Ka njerëz që humbin jetën nga aksidentet rrugore.
Aty duhet të jetë policia.
Jo te show-i. Te puna.
Nëse duan të kontrollojnë pasuritë, le t’i kontrollojnë. Nëse duan të ndjekin paratë, le t’i ndjekin deri në bankë, kompani, kontratë dhe transaksion.
Por të dalësh në rrugë e të pyesësh “të kujt e ke makinën?” dhe ta quash këtë luftë kundër pastrimit të parave, është të tallesh me inteligjencën e këtij populli.
Sepse shqiptarët nuk duan të dinë vetëm kujt i përket makina.
Duam të dimë nga kanë ardhur paratë për ta blerë.
Dhe kjo është një pyetje që nuk zgjidhet me një kontroll në rrugë.
Zgjidhet duke ndjekur paranë.
Lexo edhe
“Kush ta bleu makinën?”/ Policia nis kontrollet ndaj automjeteve luksoze në Tiranë
EMRAT/“Kulla e donacione: Kush janë bosët e fesë që po ndërtojnë në Tiranë”
