Partia Demokratike ka depozituar në Gjykatën Kushtetuese kërkesën për kontrollin e ligjit ratifikues të marrëveshjes së huasë prej 302 milionë eurosh ndërmjet Shqipërisë dhe Shteteve të Bashkuara të Amerikës për blerjen e pajisjeve ushtarake.
Lajmi është bërë i ditur nga kreu i Grupit Parlamentar të PD-së, Gazment Bardhi, i cili deklaroi se opozita ka identifikuar shtatë shkelje kushtetuese në procedurën e ndjekur nga mazhoranca për miratimin e marrëveshjes.
Bardhi tha se PD ka kërkuar nga Gjykata Kushtetuese shfuqizimin e ligjit ratifikues dhe pezullimin e tij.
Sipas kreut të grupit parlamentar demokrat, opozita e mbështet në parim marrëveshjen me SHBA-në, pasi e konsideron të rëndësishme për modernizimin e Forcave të Armatosura dhe për përmbushjen e detyrimeve të Shqipërisë në kuadër të NATO-s. Kundërshtimi i PD-së, sipas tij, lidhet me mënyrën dhe procedurën përmes së cilës marrëveshja u miratua në Kuvend.
“Problemi nuk është marrëveshja, të cilën edhe sot pas miratimit antikushtetues nuk e njohim se çfarë përmban. Problemi është mënyra antikushtetuese se si shumica vendosi ta miratonte marrëveshjen”, deklaroi Bardhi.
Shtatë shkeljet që pretendon PD
Sipas Partisë Demokratike, shkelja e parë lidhet me faktin se deputetëve nuk iu dha mundësia të njiheshin me marrëveshjen përpara votimit. Bardhi pretendon se deputetëve iu mohua koha e nevojshme për shqyrtimin e dokumentit, konsultimin dhe marrjen e një vendimi të informuar.
Shkelja e dytë, sipas opozitës, lidhet me mungesën e raportit që justifikon efektet financiare të projektligjit. PD pretendon se deputetët nuk patën në dispozicion informacionin e nevojshëm për të vlerësuar ndikimin e marrëveshjes në financat publike.
Shkelja e tretë lidhet me procedurën e ndryshimit të rendit të ditës. Bardhi pretendon se ndryshimi nuk është njoftuar brenda afatit të përcaktuar dhe se kjo ka cenuar të drejtën e deputetëve për debat parlamentar, paraqitje amendamentesh dhe votim të informuar.
Sipas PD-së, shkelja e katërt ka të bëjë me përdorimin e procedurës së përshpejtuar brenda një afati shumë të shkurtër. Bardhi argumenton se kjo procedurë është në kundërshtim me standardet e vendosura më herët nga Gjykata Kushtetuese lidhur me funksionimin e Kuvendit.
Shkelja e pestë, sipas opozitës, lidhet me pretendimin se nuk ka ekzistuar një situatë objektive urgjence që të justifikonte procedurën e përshpejtuar. Bardhi argumenton se marrëveshja ishte miratuar në parim dhe nënshkruar disa javë më herët dhe se qeveria kishte pasur kohë ta ndiqte procedurën e zakonshme parlamentare.
Shkelja e gjashtë lidhet me të drejtën e një të pestës së deputetëve për t’iu drejtuar Gjykatës Kushtetuese për kontrollin e një marrëveshjeje përpara ratifikimit. Sipas Bardhit, procedura e ndjekur brenda një dite e ka kufizuar në praktikë këtë të drejtë të opozitës.
Ndërsa shkelja e shtatë, sipas PD-së, lidhet me statusin e klasifikuar të marrëveshjes dhe pamundësinë e publikimit të saj në Fletoren Zyrtare. Bardhi pretendon se kjo krijon probleme kushtetuese sa i përket hyrjes në fuqi të marrëveshjes dhe përfshirjes së saj në sistemin juridik shqiptar.
Bardhi: Marrëveshja duhet të miratohet sipas Kushtetutës
Gazment Bardhi deklaroi se qëllimi i kërkesës së PD-së nuk është kundërshtimi i marrëdhënieve strategjike me Shtetet e Bashkuara, por garantimi i respektimit të Kushtetutës dhe procedurave parlamentare.
Sipas tij, nëse Gjykata Kushtetuese e shqyrton çështjen me përparësi, marrëveshja mund të rikthehet për miratim përmes një procedure të rregullt parlamentare.
“Qëllimi ynë është të mbrojmë kushtetutshmërinë në vend dhe që marrëveshja më e rëndësishme ndërmjet Shqipërisë dhe Shteteve të Bashkuara në fushën e mbrojtjes dhe sigurisë kombëtare të miratohet sipas Kushtetutës”, u shpreh Bardhi.
Ai shtoi se aleanca strategjike me SHBA-në, sipas tij, duhet të forcohet përmes respektimit të shtetit të së drejtës dhe institucioneve demokratike.
Tashmë pritet që Gjykata Kushtetuese të shqyrtojë kërkesën e depozituar nga Partia Demokratike dhe të vendosë nëse çështja plotëson kushtet për t’u marrë në shqyrtim, ndërsa më tej do të përcaktohet edhe qëndrimi i saj për ligjin ratifikues të marrëveshjes.
Lexo edhe:
Bardhi dhe Balliu i hedhin ujë Ramës në Kuvend, ndërhyn Garda
Përjashtohet Gazment Bardhi, pasi lagu me ujë Ramën në Kuvend
