Drejtoria e Përgjithshme e Burgjeve ka reaguar pas interesimit publik për rastin e 34-vjeçares në burg, e cila po vuan një dënim prej dy muajsh në IEVP Pojskë së bashku me foshnjën e saj 11-muajshe.
Në një deklaratë zyrtare, Drejtoria e Përgjithshme e Burgjeve thotë se procedurat janë kryer në përputhje me legjislacionin në fuqi dhe se nëna ka ushtruar të drejtën për të mbajtur pranë saj fëmijën nën moshën 3 vjeç.
Sipas institucionit, foshnja është akomoduar në ambiente të posaçme, të përshtatura për qëndrimin e nënave me fëmijët e tyre dhe jashtë regjimit të brendshëm të institucionit.
Drejtoria e Burgjeve: Nëna dhe fëmija kanë plan individual përkujdesjeje
Drejtoria e Përgjithshme e Burgjeve sqaron se për nënën dhe fëmijën është hartuar një plan i individualizuar përkujdesjeje.
Ky plan përfshin masat e sigurisë, kujdesin shëndetësor, ushqimin sipas nevojave të fëmijës, si dhe mbështetjen psikologjike dhe sociale.
Sipas deklaratës, zbatimi i planit monitorohet nga stafi multidisiplinar i institucionit, me qëllim garantimin e mirëqenies së nënës dhe foshnjës.
34-vjeçarja po vuan dënimin prej dy muajsh
Sipas Drejtorisë së Burgjeve, 34-vjeçarja me inicialet D. S. është dënuar me dy muaj burgim.
Gjatë procedurave të pranimit në institucion, ajo ka ushtruar të drejtën e parashikuar nga Ligji nr. 81/2020 “Për të Drejtat dhe Trajtimin e të Dënuarve me Burgim dhe të Paraburgosurve” dhe Rregullorja e Përgjithshme e Burgjeve, për të mbajtur pranë saj fëmijën nën moshën 3 vjeç.
Pas përfundimit të procedurave ligjore dhe administrimit të dokumentacionit, foshnja është akomoduar në ambientet e posaçme të institucionit.
Drejtoria e Burgjeve thekson se këto ambiente janë përshtatur për qëndrimin e nënave me fëmijët e tyre.
Reagimi vjen pas interesimit publik për rastin
Reagimi i Drejtorisë së Përgjithshme të Burgjeve vjen pas interesimit publik për 34-vjeçaren në burg me foshnjën e saj.
Më herët, për rastin ka reaguar edhe Avokati i Popullit, i cili ka deklaruar se ka nisur verifikimet për mënyrën se si është zhvilluar procedura ndaj 34-vjeçares.
Institucioni ka deklaruar se synimi i tij është garantimi i të drejtave të nënës dhe fëmijës dhe respektimi i interesit më të mirë të fëmijës.
Deklarata e Drejtorisë së Përgjithshme të Burgjeve
“Në zbatim të legjislacionit në fuqi, që garanton mbrojtjen e të drejtave të nënave të privuara nga liria dhe interesin më të mirë të fëmijës, në IEVP Pojskë është akomoduar e dënuara me inicialet D. S., e dënuar me 2 (dy) muaj burgim, së bashku me foshnjën e saj 11-muajshe.
Gjatë procedurave të pranimit në institucion, shtetasja me inicialet D. S. ushtroi të drejtën e parashikuar nga Ligji nr. 81/2020 “Për të Drejtat dhe Trajtimin e të Dënuarve me Burgim dhe të Paraburgosurve” dhe Rregullorja e Përgjithshme e Burgjeve, për të mbajtur pranë saj fëmijën nën moshën 3 vjeç.
Pas përfundimit të procedurave ligjore dhe administrimit të dokumentacionit përkatës, foshnja u akomodua në ambientet e posaçme të institucionit, jashtë regjimit të brendshëm, ambiente të përshtatura për qëndrimin e nënave me fëmijët e tyre.
Për nënën dhe fëmijën është hartuar një plan i individualizuar përkujdesjeje, i cili përfshin masat e sigurisë, kujdesin shëndetësor, ushqimin sipas nevojave, si dhe mbështetjen psikologjike dhe sociale.
Zbatimi i këtij plani monitorohet nga stafi multidisiplinar i institucionit, me synimin për të garantuar mirëqenien e nënës dhe të fëmijës, si dhe respektimin e të drejtave të tyre, në përputhje me legjislacionin dhe standardet në fuqi.”
